Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa si rasmi ah u saxiixay Xeerka Shaqada Soomaaliya, kaasoo horey ay u ansixiyeen Golaha Shacabka 7-dii Agoosto 2024, halka Golaha Aqalka Sare ay ansixiyeen 25-kii Nofeembar 2024.
Xeerkan cusub wuxuu ka kooban yahay 35 cutub, wuxuuna khuseeyaa dhammaan loo-shaqeeyayaasha iyo shaqaalaha dalka. Si kastaba ha ahaatee, xeerkan laguma dabaqayo ciidamada qalabka sida, marka laga reebo shaqaalaha lagu shaqaaleysiiyay nidaamka rayidka ah.
Xeerkan wuxuu si cad u qeexayaa in qof kasta uu xaq u leeyahay fursado shaqo oo siman**, iyada oo aan lagu salayn:
Sinjigiisa, Jinsigiisa, Luqaddiisa, Diintiisa, Ra'yigiisa siyaasadeed Ama wax kale oo qofka uu aaminsan yahay.
Xeerkan cusub wuxuu diiradda saaraya in shaqaalaha Soomaaliyeed ay helaan xuquuqda ay ku leeyihiin goobaha shaqada, iyada oo la ilaalinayo danta guud iyo horumarka dhaqaalaha dalka. Waxa uu si gaar ah u xoojinayaa: Cadaaladda shaqada, Badbaadada shaqaalaha, Kor u qaadista heerka shaqo ee dalka.
Dowladda Federaalka Soomaaliya ayaa sheegtay in dib-u-eegista iyo casriyeynta xeerkan ay tahay tallaabo muhiim ah oo lagu horumarinayo nidaamka shaqada, isla markaana la jaanqaadaysa horumarka ganacsiga xorta ah ee dalka.