Mas'uuliyiin hor dhac u ah booqashada Madaxweynaha oo gaaray Laascaanood

Laascaanood, 13 Janaayo 2026 (Dawan)– Mas'uuliyiin sare oo ka socda Dowladda Federaalka Soomaaliya ayaa kusii qulqulaya magaalada Laascaanood, kuwaas oo hordhac u ah booqashada la filayo in Madaxweyne Xasan Sheekh Maxamuud ku tago xarunta Dowlad Goboleedka Waqooyi Bari Soomaaliya maalmaha soo socda.

Mas'uuliyiinta shalay gaaray, waxaa ka mid ahaa Guddoomiye Ku-xigeenka Labaad ee Aqalka Sare, Cabdullaahi Cali Xirsi (Timacadde), Wasiirka Amniga Gudaha, Cabdullaahi Sheekh Ismaaciil (Fartaag), Wasiirka Tamarta iyo Khayraadka Biyaha, Cabdullaahi Bidhaan Warsame, iyo Taliyaha Ciidanka Booliska Soomaaliyeed, Asad Cismaan Cabdullaahi.

Sidoo kale, maanta waxaa ka degay Wasiirka Gaashaandhigga, Axmed Macllin Fiqi, Wasiirka arrimaha gudaha, Cali Yuusf Cali iyo xubno kale oo ka tirsan xukuumadda.

gaaritaanka wafdigan ayaa daba socday ciidamo ka tirsan hay’adaha amniga federaalka oo horay loo geeyay Laascaanood, kuwaas oo ka shaqeynaya sugidda amniga inta ay socoto booqashada Madaxweynaha.

Masuuliyiinta federaalka ayaa waxaa garoonka diyaaradaha ku soo dhaweeyay Guddoomiyaha Baarlamaanka Maamulka Waqooyi Bari, Aadan Cabdullaahi Aw-Xasan, iyo masuuliyiin kale oo ka tirsan maamulka iyo bulshada deegaanka.

Intii ay ku sugnaayeen magaalada, wafdiga federaalka ayaa kulan la yeeshay Madaxweyne Ku-xigeenka Maamulka Waqooyi Bari, Cabdirashiid Yuusuf Jibriil, iyagoo ka wada hadlay arrimaha la xiriira isku-dubaridka farsamada, amniga, iyo jadwalka booqashada Madaxweynaha.

Madaxweyne Xasan Sheekh Maxamuud ayaa lagu wadaa inuu Laascaanood kaga qeyb galo munaasabadda caleemo-saarka Madaxweynaha Waqooyi Bari, Cabdiqaadir Axmed Caw-Cali (Firdhiye), taas oo loo arko dhacdo muhiim ah oo ku saabsan isbeddelka siyaasadeed iyo xasilloonida gobolka.

Booqashadan la filayo ayaa lagu tilmaamay mid istiraatiiji ah, oo lagu xoojinayo xiriirka u dhexeeya dowladda federaalka iyo maamulka Waqooyi Bari, isla markaana diraysa farriin cad oo ku aaddan midnimada, wadajirka, iyo dib-u-dhiska dowladnimada Soomaaliya.