Maxaa kasoo baxay kulankii Golaha Wasiirrada ee uu guddoomiyay madaxweyne Xasan?

Kulanka ayaa sidoo kale lagu ansixiyay laba heshiis is-afgarad oo muhiim ah, kuwaas oo kala ah heshiis dhanka amniga ah oo u dhexeeya Soomaaliya iyo Uganda, kaas oo lagu xoojinayo iskaashiga amni iyo la-dagaallanka khataraha gobolka, iyo heshiis kale oo u dhexeeya Soomaaliya iyo Boqortooyada Sacuudiga, kaas oo quseeya iskaashiga gaadiidka badda.

Intaas waxaa dheer, Golaha Wasiirrada ayaa ansixiyay dhowr hindise sharciyeed iyo siyaasado qaran oo muhiim ah, kuwaas oo ay ka mid yihiin hindise sharciyeedka caddaymaha maxkamadaha, heshiis ku saabsan tababarka iyo shahaadooyinka caalamiga ah ee badmaaxiinta, xeer lagu dhisayo Machadka Badaha Soomaaliyeed, sharci lagu ilaalinayo xogta dadweynaha, iyo siyaasadda qaran ee loogu talagalay dadka naafada ah.

Dhanka kale, kulanka ayaa lagu dhageystay warbixinno la xiriira xaaladda abaaraha dalka iyo qorshayaasha la xiriira batroolka. Wasiirka Batroolka iyo Macdanta Daahir Shire Maxamed ayaa Golaha la wadaagay xog ku saabsan horumarka la filayo ee qodista batroolka, halka Guddoomiyaha Hay’adda Maareynta Masiibooyinka Qaranka (SODMA), Maxamuud Macallin Cabdulle, uu ka warbixiyay xaaladda abaarta iyo baahiyaha degdegga ah ee ka jira deegaanno ka mid ah dalka. Kulankan degdegga ah ayaa imanaya xilli ay Soomaaliya wajahaysaa caqabado amni, kuwo bani’aadamnimo iyo isbeddello siyaasadeed, iyadoo dowladda federaalku ay dadaal ugu jirto xoojinta amniga, horumarinta hay’adaha, iyo ballaarinta xiriirrada caalamiga ah.