Muqdisho, Soomaaliya - Madaxweynaha Soomaaliya, Xasan Sheekh Maxamuud, ayaa shir-guddoomiyay kulan ay isugu yimaadeen hogaamiyeyaasha dowlad-goboleedyada Koofurgalbeed, Hirshabeelle, iyo Galmudug.
Sida lagu sheegay warsaxaadeed ka soo baxay Madaxtooyada Soomaaliya, Kulanka ayaa horudhac u ah baaqii Madaxweynaha ee ku saabsan dadaallada lagu mideynayo shacabka Soomaaliyeed si loo laba-jibaaro hawlgallada ka dhanka ah kooxaha Al-Shabaab iyo Daacish.
Madaxtooyadu waxa ay sheegtay in Intii uu socday kulanka, madaxda ay ka wada hadleen muhiimadda ay leedahay in loo diyaargaroobo gogosha qaran ee dhawaan uu ku baaqay Madaxweynaha, taasoo ujeedkeedu yahay in la abuuro jawi midnimo iyo isfaham guud oo ku wajahan la-dagaallanka kooxaha AS iyo Daacish. Kulanku wuxuu sidoo kale diiradda saaray sidii loo xoojin lahaa wada-shaqeynta dhammaan qaybaha bulshada si loo xaqiijiyo guulaha dagaalka.
Madaxweyne Xasan Sheekh iyo madaxda dowlad-goboleedyada ayaa sidoo kale isku raacay in hawlgallada lagu saleeyo niyadsami iyo tixgelinta talooyinka, tusaalooyinka, iyo taageerada indheergaradka, aqoonyahanka, hoggaamiyeyaasha siyaasadda, iyo guud ahaan bulshada.
“Madaxweynaha Qaranka iyo Madaxda Dowlad-goboleedyadu waxa ay isku raaceen in lagu howlgalo niyadsami, iyadoo saldhig u ah tixgelinta talada, tusaalaha, iyo taageerada indheergaradka, aqoonyahanka, hoggaamiyeyaasha siyaasadda iyo guud ahaan bulshada,” ayaa lagu yiri warsaxaafadeed ka soo baxay Madaxtooyada Soomaaliya.
Taageerada iyo Caqabadaha
Kulankaan ayaa yimaaday isbuuc ka dib markii Madaxweyne Xasan Sheekh uu ku dhawaaqay inuu diyaarinayo gogol nabadeed oo loogu talagalay in lagu wada hadlo sidii looga gudbi lahaa xaaladda adag ee dalku ku jiro.
Baaqa Madaxweynaha ayaa helay taageero ballaaran oo ka timid hoggaamiyeyaasha mucaaradka, sida Shariif Sheekh Axmed, Xasan Cali Khayre, iyo Cabdiraxmaan Cabdishakuur Warsame, iyo sidoo kale qaar ka mid ah madaxda dowlad-goboleedyada sida Jubbaland. Waxay dhammaantood codsadeen in la bixiyo faahfaahin dheeri ah oo ku saabsan ajendaha, waqtiga, iyo cidda ka qeybgaleysa shirka inkastoo weli ay muuqato inay taaganyihiin su’aalihii.