Garoowe, 7 Janaayo 2026 (Dawan)- Madaxweynaha Dowlad Goboleedka Puntland, Siciid Cabdullaahi Deni, ayaa magaalada Garoowe kulan kula yeeshay Qunsulka Guud ee Itoobiya, Tagesse Lambamo Dimbore, xilli ay gobolka ka taagan yihiin xiisado siyaasadeed iyo kuwo amni.
Kulanka ayaa ka dhacay Madaxtooyada Puntland, waxaana ka qeyb galay saraakiil sare oo ka tirsan qunsuliyadda Itoobiya, sida lagu sheegay war kooban oo ka soo baxay xafiiska madaxweynaha. Si kastaba ha ahaatee, wax faahfaahin ah lagama bixin qodobada rasmiga ah ee looga hadlay kulankaas.
“Madaxweynaha Puntland ayaa maanta qaabilay Qunsulka Guud ee Itoobiya iyo wafdi la socday,” ayaa lagu yiri bayaanka Madaxtooyada, iyadoo aan la shaacin natiijooyin ama ajande cad oo kulankaas ka soo baxay.
Kulankan ayaa kusoo beegmayaa xilli ay taagan yihiin khilaafaad siyaasadeed oo u dhexeeya Puntland iyo dowladda federaalka Soomaaliya, gaar ahaan arrimaha la xiriira wax ka beddelka dastuurka iyo hannaanka doorashooyinka la filayo 2026-ka.
