Muqdisho – 7 Janaayo 2026 (Dawan)- Boqolaal qof oo ay hoggaaminayaan culimo iyo waxgarad kale ayaa maanta oo Arbaco ah isugu soo baxay fagaaraha Daljirka Dahsoon ee magaalada Muqdisho, iyagoo si adag u diidan go’aankii Israa’iil ay ku aqoonsatay Somaliland, kaas oo ay ku tilmaameen mid halis ku ah midnimada Soomaaliya iyo xasilloonida guud ee Geeska Afrika.
Dibadbaxan oo uu soo qabanqaabiyay Golaha Culimada Soomaaliyeed ayaa noqday mudaaharaadkii saddexaad ee wayn ee ka dhaca caasimadda tan iyo markii Israa’iil ay 26-kii Diseembar ku dhawaaqday aqoonsiga Somaliland. Dibadbaxayaasha ayaa watay boorar muujinaya midnimada dhuleed ee Soomaaliya, iyagoo ku dhawaaqayay hal-ku-dhigyo ay ku cambaareynayeen Israa’iil, kana digayay waxa ay ku tilmaameen “faragelin shisheeye”.
Afhayeenka Golaha Culimada Soomaaliyeed, Cali Maxamuud Xasan, oo la hadlay Dawan Africa, ayaa sheegay in go’aanka Israa’iil uu yahay mid khatar ku ah amniga gobolka. “Tani waa tallaabo fure u noqon karta fowdo goboleed, isla markaana dhiirrigelin karta kooxaha xagjirka ah ee ka faa’iideysta xiisadaha siyaasadeed,” ayuu yiri.
