Muqdisho (Dawan) – Ra’iisul Wasaarihii hore ee Soomaaliya, Maxamed Xuseen Rooble, ayaa Khamiistii magaalada Muqdisho ku muujiyay taageero u hayo Somaliland, isagoo ku eedeeyay dowladda federaalka inay hanjabaad adeegsanayso halkii ay wadahadal iyo isfaham la geli lahayd maamulka iskii madaxbannaanida ugu dhawaaqay ee Somaliland.
Rooble oo shir jaraa’id qabtay ayaa xasuusiyay kaalintii Somaliland ku lahayd midnimada Soomaaliya, isagoo yiri: “Walaalaheen Somaliland iyagaa ahaa kuwii ugu horreeyay ee calanka sudhay oo midnimada horseeday. Hase yeeshee maanta cid la fadhiisata, la hadasha ama kalsooni siisa ma helaan. Halkii taas laga sameyn lahaa, waxaa lagu hanjabayaa in la dumiyo nidaamkii ay dhiseen.”
Wuxuu ku eedeeyay Muqdisho inay caqabad ku tahay gargaarka loo marsiiyo Somaliland, isla markaana ay faafiso dacaayad lagu dhaawacayo sumcadda maamulka Hargeysa. “Gargaarka yar ee loo qoondeeyo Somaliland ee soo mara dowladda federaalka inta badan waa la xanibaa, waxaana la sii daayaa dacaayado jaban oo lagu eedeeyo lana dhaleeceeyo Somaliland,” ayuu yiri.Rooble ayaa intaas ku daray: “Waxaan la damqanayaa Somaliland aragti la’aanta iyo faham darrada ay muujisay dowladda federaalka, waxaana idinku boorinayaa inaad si geesinimo leh hore ugu socotaan.”
Hadalka Rooble ee ku saabsan boorinta iyo taageerada ayaa dad badani u fasireen inuu ula jeedo aqoonsi raadinta Somaliland, inkasta oo uusan si rasmi ah u dhihin inuu taageersan yahay aqoonsi raadinta Somaliland.
Hadalka Rooble ayaa yimid iyadoo Somaliland ay xoojisay ololeheeda aqoonsi raadinta. Madaxweyne Cabdiraxmaan Maxamed Cabdillaahi “Cirro” ayaa ku baaqay in Mareykanku door firfircoon ka qaato, wuxuuna xitaa taageeray in madaxweynaha Mareykanka Donald Trump lagu abaalmariyo Nobel Peace Prize, isagoo arrinta aqoonsiga Somaliland ku xiray hoggaaminta caalamiga ah ee Washington.
Tan iyo markii ay madaxbannaanida ku dhawaaqday 1991, Somaliland waxay dhisatay hay’ado iyo ciidamo amni u gaar ah, hase yeeshee waddan rasmi ah weli ma aqoonsan. Si kastaba, xiriirka caalamiga ah ee lala yeesho Hargeysa ayaa sanadihii dambe si joogto ah u kordhay.Villa Somalia wax jawaab ah kama aysan bixin hadalka Rooble.