Soomaaliya: Aqoonsiga Israa’iil ee Somaliland waa waxba kama jiraan

Jeddah ( Dawan)- Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaam Cabdi Cali, oo maanta ka hadlay kulankii deg-degga ahaa ee Golaha Wasiirrada Arrimaha Dibadda ee Ururka Iskaashiga Islaamka, ayaa ku eedeeyey Israa’iil in ay ku kacday tallaabo halis ah oo aan sharciga waafaqsanayn.

Wasiirka ayaa sheegay iin go’aanka sraa’iil ee aqoonsiga qaybaha waqooyiga-galbeed ee Soomaaliya sida dawlad madax-bannaan ay tahay waxba ka jirin sharci ahaan, islamarkaana jebinaysa midnimada iyo xuduudaha Jamhuuriyadda Federaalka Soomaaliya.

Wuxuu caddeeyey in deegaanada loo yaqaano Somaliland in aan la goyn karin oo ay ka tirsan yihiin Soomaaliya.

Tallaabadani waxay si toos ah uga hor imaaneysaa mabaadi’da Qaramada Midoobay iyo qiyamka ururka, oo ay ka mid tahay ilaalinta midnimada iyo madax-bannaanida dalalka xubnaha ah, sida uu wasiirku sheegay.

Wasiirku wuxuu xusay in tallaabooyinkani ay halis gelinayaan xasiloonida gobolka Geeska Afrika, amniga Badweynta Cas, iyo hawlgallada caalamiga ah ee la dagaallanka argagixisada. Waxa uu tilmaamay in wax kasta oo ka hor imaanaha dastuurka Soomaaliya, sida joogitaanka ciidan ama heshiisyo lala galo maamullada aan dawladnimo lahayn, ay yihiin kuwo sharci darro ah.

Wuxuu ugu baaqay Ururka Iskaashiga Islaamka in uu si cad oo mideysan u difaaco midnimada, madax-bannaanida, iyo xuduudaha Soomaaliya, isla markaana laga hortago tallaabooyinka sharci-darrada ah ee mustaqbalka.

Wasiirka ayaa sidoo kale ku celiyey in taageerada Soomaaliya ee dadka Falastiin ay tahay mid joogto ah, islamarkaana aan la aqbali doonin in dhulka Soomaaliya loo isticmaalo weeraro ka dhan ah dalalka deriska ah.