Soomaaliya iyo Kuuriyada Koonfureed oo ka wada hadlay iskaashiga amniga badda

Muqdisho, 12 Janaayo 2026 (Dawan)- Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaam Cabdi Cali, ayaa maanta wada-hadal dhinaca taleefanka ah la yeeshay dhiggiisa Kuuriyada Koonfureed, Cho Hyun, iyagoo diiradda saaray xoojinta iskaashiga dhanka amniga badda, gaar ahaan Gacanka Cadmeed.

Sida lagu sheegay war-saxaafadeed ka soo baxay Wasaaradda Arrimaha Dibadda Soomaaliya, wada-hadallada ayaa sidoo kale lagu lafa-guray arrimo la xiriira madax-bannaanida iyo midnimada dhuleed ee Jamhuuriyadda Federaalka Soomaaliya, xilli uu gobolka wajahayo isbeddello siyaasadeed oo xasaasi ah.

Kuuriyada Koonfureed , waxaa Gacanka Cadmeed ka jooga ciidamo badeed , kuwaas oo qayb ka ah dadaallada caalamiga ah ee la dagaallanka burcad-badeedda iyo sugidda amniga maraakiibta ganacsiga. Ciidamadan ayaa isugu jira maraakiib dagaal iyo cutubyo gaar ah oo badeed.

Wada-hadalladan ayaa imanaya iyadoo Soomaaliya ay xoojinayso dadaalladeeda diblomaasiyadeed ee ay ku raadinayso taageero caalami ah, kaddib markii Israa’iil ay ku dhawaaqday aqoonsiga Somaliland, go'aankaas oo ay Muqdisho si adag uga hortimid.

Ra’iisul Wasaaraha Israa’iil, Binyamiin Netanyahu, ayaa dabayaaqadii sannadkii tegay ku dhawaaqay in Israa’iil ay u aqoonsatay Somaliland dal madax-bannaan oo ka go’ay Soomaaliya, arrintaas oo ay si weyn ugu gacan sayrtay dowladda Federaalka Soomaaliya.

Dowladda Soomaaliya ayaa sheegtay in ujeeddada Israa’iil ee aqoonsigaasi inay salka ku hayso qorshaheeda la xiriira in ay saldhig militari ka sameysato Somaliland, taas oo u sahlaysa inay saameyn ku yeelato Gacanka Cadmeed, oo ka mid ah marin-biyoodka ugu muhiimsan ganacsiga caalamiga ah. Somaliland ayaa dhankeeda beenisay eedeymahaas, iyadoo ku eedeysay Muqdisho inay faafinayso warar aan sal iyo raad toona lahayn.

Gacanka Cadmeed ayaa ah marin-biyood istaraatiiji ah oo ay maraan maraakiib ganacsi oo tiro badan, waxaana ku sugan maraakiib ciidan oo dalal kala duwan ka socda, kuwaas oo u xilsaaran sugidda amniga badda iyo ka hortagga khataraha amni ee gobolka.

Wasaaradda Arrimaha Dibadda Soomaaliya ayaa sidoo kale sheegtay in Kuuriyada Koonfureed ay intii wada-hadalku socday mar kale adkaysay taageeradeeda buuxda ee madax-bannaanida, midnimada dhuleed iyo qaranimada Soomaaliya.