Soomaaliya oo ballanqaad diblomaasiyadeed ka heshay Koonfur Afrika

Muqdisho, 20 Jannaayo 2026 – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa khadka taleefanka kula yeeshay wada-hadal dhiggiisa Jamhuuriyadda Koonfur Afrika, Cyril Ramaphosa, kaas oo diiradda lagu saaray xoojinta xiriirka laba geesoodka ah iyo iskaashiga arrimaha gobolka.

Bayaan ka soo baxay Madaxtooyada Soomaaliya ayaa lagu sheegay in labada madaxweyne ay ka wada hadleen xaaladda guud ee gobolka, fursadaha lagu horumarin karo iskaashiga wadajirka ah ee danaha ka dhexeeya labada dal, iyo dadaallada lagu adkaynayo nabadgelyada iyo horumarka waara ee Geeska Afrika.

Intii uu socday wada-hadalka, Madaxweyne Ramaphosa ayaa mar kale xaqiijiyay taageerada buuxda ee dowladda Koonfur Afrika ay u hayso madax-bannaanida, midnimada iyo wadajirka dhuleed ee Jamhuuriyadda Federaalka Soomaaliya, taas oo loo arkay fariin diblomaasiyadeed oo muujinaysa garab istaag siyaasadeed oo cad, xilli ay Soomaaliya dadaal ugu jirto helidda xulufo ay uga hortgato go'aankii ay Israa'iil ku aqoonsatay Somaliland

Wada-hadalkan taleefanka ah ayaa imanaya xilli Soomaaliya ay sii ballaarinayso dhaqdhaqaaqeeda diblomaasiyadeed ee Afrika, iyadoo diiradda saaraysa xoojinta xiriirka dalalka saaxiibka ah, si kor loogu qaado doorka ay ku leedahay arrimaha nabadda, amniga iyo iskaashiga gobolka.

Soomaaliya ayaa sannadihii u dambeeyay dadaal xooggan gelisay ballaarinta xiriirkeeda diblomaasiyadeed ee Afrika, iyadoo diiradda saareysa dib-u-dhiska hay’adaha dowladda, soo jiidashada maalgashiga, iyo xoojinta iskaashiga amniga. Koonfur Afrika, oo ah dalka ugu dhaqaalaha wayn qaaradda, ayaa door muuqda ku leh arrimaha nabadda iyo amniga Midowga Afrika, isla markaana leh ka-qaybgal diblomaasiyadeed oo ballaaran oo ku aaddan Geeska Afrika.

Inkasta oo uusan war-saxaafadeedku xusin heshiisyo cusub, haddana mas’uuliyiin ayaa sheegay in wada-hadalkan uu qeyb ka yahay dadaallada joogtada ah ee Muqdisho ay ku doonayso in ay ku xoojiso xiriirka ay la leedahay dalalka Afrika ee muhiimka ah, isla markaana ay Soomaaliya uga muuqato si firfircoon masraxa siyaasadda iyo dhaqaalaha qaaradda.