Muqdisho (Dawan) — Dowladda Federaalka Soomaaliya ayaa si rasmi ah u burisay dhammaan heshiisyadii ay la lahayd Dowladda Isutagga Imaaraadka Carabta, kuwaas oo ay ku jiraan heshiisyada ku saabsan maamulka dekedaha iyo iskaashiga amniga, taasoo ah tallaabo ka mid ah go’aannadii siyaasadeed ee ugu culus ee dowladda sannadihii u dambeeyay.
Go’aankan ayaa waxaa ansixiyey Golaha Wasiirrada Soomaaliya, ka dib kulan degdeg ah oo maanta la qabtay. Go’aanka oo nuqul ka mid ah ay heshay Dawan Tv ayaa lagu sheegay in dhammaan heshiisyadii iyo is afgaradyadii ka dhaxeeyay Soomaaliya iyo Imaaraadka, gaar ahaan kuwa quseeya dekedaha Berbera, Boosaaso, iyo Kismaayo, iyo sidoo kale heshiisyadii laba-geesoodka ahaa ee amniga iyo difaaca, in la laalay.
Golaha Wasiirrada ayaa cadeeyay in go’aankan uu ku saleysan yahay caddaymo muujinaya in qaar ka mid ah tallaabooyinka Imaaraadka ay wax u dhimayaan madaxbannaanida, midnimada dhuleed, iyo nidaamka dastuuriga ah ee Soomaaliya, isla markaana ay ka hor imaanayaan sharciga gudaha iyo kan caalamiga ah.
Go’aanka ayaa sidoo kale tilmaamay in falalkaasi ay ka soo horjeedaan mabaadii’da ku cad Axdiga Qaramada Midoobay, Midowga Afrika, Jaamacadda Carabta, iyo Ururka Iskaashiga Dalalka Islaamka, kuwaas oo Soomaaliya xubin ka tahay.
