Soomaaliya oo qorsheyneysa in cabista sigaarka lagu koobo goobo gaar ah

Muqdisho (Dawan)– Golaha Shacabka ee Baarlamaanka Federaalka Soomaaliya ayaa maanta oo Isniin ah ansixiyay heshiiska Caalamiga ah ee Xakamaynta Tubaakada, iyada oo la xoojinayo dadaallada lagu dhimayo khataraha caafimaad ee ka dhasha tubaaka-cabista iyo xakameynta ganacsiga sharci-darrada ah ee tubaakada.

Heshiiska la meel mariyay ayaa hoos yimaada Heshiiska Ururka Caafimaadka Adduunka ee Xakamaynta Tubaakada (WHO FCTC), waxaana lagu ansixiyay fadhigii 29-aad ee kalfadhiga 7-aad ee Golaha Shacabka, iyadoo habraaca codeynta uu guddoominayay Guddoomiye Ku-xigeenka Labaad ee golaha, Cabdullaahi Cumar Abshirow.

Heshiiskan ayaa ogolaansho ka helay 139 xildhibaan, saddex kalena way ka aamuseen, mana jirin cid diidday, sida lagu sheegay natiijada codeynta.

Wasiirka Caafimaadka iyo Adeegga Bulshada ee Soomaaliya, Cali Xaaji Aadan, ayaa ansixinta kaddib ku ammaanay xildhibaanada mudnaanta ay siiyeen caafimaadka bulshada. Wuxuu sheegay in hirgelinta axdigan ay horseedi doonto xeerar adag oo lagu xakameynayo isticmaalka tubaakada, isla markaana lagu ilaalinayo dadka aan cabin sigaarka.

"Hirgelinta heshiiskani waa tallaabo loo qaaday xisbiga hagaajinta caafimaadka bulshadeena iyo ka hortagga dhibaatooyinka ka dhasha tubaakada iyo badeecadaha la xiriira." ayuu yiri, Wasiirku.

Sida ku cad heshiiska la ansixiyay, dowladda Soomaaliya ayaa qorsheyneysa in sigaarka lagu koobbo goobo gaar ah, si looga ilaaliyo dadweynaha qiiqa tubaakada ee goobaha ay si wadajir ah u adeegsadaan. Waxa kale oo heshiisku dhigaya in la xaddido xayaysiinta tubaakada, in xirmooyinka sigaarka lagu daro digniino caafimaad oo cad, iyo in si adag loola dagaallamo ganacsiga sharci-darrada ah ee alaabta tubaakada.

Mas’uuliyiinta caafimaadka ayaa tilmaamay in axdigan uu siinayo dowladda qaab-dhismeed sharci oo dhameystiran oo ay ku hirgeliso siyaasado lagu yareynayo saameynta caafimaad, bulsho iyo dhaqaale ee ka dhasha tubaaka-cabista.

Sharcigan ayaa hadda u gudbi doonaa Aqalka Sare ee Baarlamaanka si ay uga doodaan una meelmariyaan, waxaana xiga in loo gudbiyo Madaxweynaha Jamhuuriyadda Federaalka Soomaaliya si uu u saxiixo, kaddibna si rasmi ah loo dhaqangeliyo.