Soomaaliya xiriirka ma u jari doontaa Imaaraadka?

Muqdisho (Dawan)– Wasiirka Warfaafinta, Dhaqanka iyo Dalxiiska ee Dowladda Federaalka Soomaaliya, Daa’uud Aweys Jaamac, ayaa sheegay in dowladda Soomaaliya aysan qorshaha ugu jirin hadda in si toos ah loo jaro xiriirka ay Soomaaliya la leedahay Imaaraadka Carabta, isagoo caddeeyay in go’aanka ay dowladdu qaadatay uu ku kooban yahay oo kaliya baabi’inta heshiisyadii hore ee labada dhinac.

Wareysi uu siiyay telefishinka Al Jazeera, wasiirku wuxuu ku caddeeyay in ilaa iyo hadda aysan jirin wax go’aan ah oo ku saabsan joojinta xiriirka diblomaasiyadeed ama iskaashiga guud ee u dhexeeya Muqdisho iyo Abu Dhabi.

“Ilaa hadda go’aanka aan qaadannay wuxuu ku kooban yahay oo keliya baabi’inta heshiisyadii hore, mana khuseeyo arrimo kale oo dheeraad ah,” ayuu yiri Wasiirka Warfaafinta.

Hadalkan ayaa yimid kaddib su’aalo isa soo tarayay oo la xiriira mustaqbalka xiriirka Soomaaliya iyo Imaaraadka Carabta, gaar ahaan kaddib markii Dowladda Federaalka Soomaaliya ay si rasmi ah u shaacisay baabi’inta dhammaan heshiisyadii ay la gashay Imaaraadka.

Dowladda Soomaaliya ayaa horay u sheegtay in go’aankan uu ku saleysan yahay qiimeyn ay sameysay, isla markaana ujeeddadiisu tahay ilaalinta madax-bannaanida, midnimada iyo danaha qaranka, iyadoo hoosta ka xarriiqday in tallaabadaasi aysan micnaheedu ahayn jaris xiriir diblomaasiyadeed.

Arrintan ayaa weli si weyn looga doodayaa fagaarayaasha siyaasadda iyo warbaahinta, iyadoo indhaha lagu hayo tallaabooyinka xiga ee ay qaadi doonto Dowladda Federaalka Soomaaliya iyo sida ay saameyn ugu yeelan doonaan xiriirka labada dal.