Turkiga oo wada dadaallo diblomaasiyadeed oo lagu taageerayo midnimada Soomaaliya

Inkasta oo Imaaraadka Carabta uu marar badan ku celiyay taageerada uu u hayo midnimada iyo madax-bannaanida Soomaaliya, gaar ahaan shirarkii ugu dambeeyay ee Jaamacadda Carabta, haddana Muqdisho ayaa muujisay walaac la xiriira xiriirrada dhaqaale iyo maalgashi ee qotada dheer ee u dhexeeya Imaaraadka iyo Somaliland.

Intii uu socday wicitaanka, labada hoggaamiye ayaa sidoo kale ka wada hadlay colaadda Yemen, iyadoo Erdogan uu mar kale adkeeyay mowqifka Turkiga ee ku aaddan ilaalinta midnimada Yemen. Sidoo kale, waxa uu si gaar ah diiradda u saaray xaaladda bini’aadantinimo ee Qaza, isagoo ugu baaqay beesha caalamka inay qaaddo tallaabo degdeg ah oo lagu soo afjarayo dhibaatada ka taagan halkaas, lana bilaabo qorshayaal dib-u-dhis.

Turkiga ayaa muddooyinkii dambe isu muujiyay saaxiib istiraatiiji ah oo muhiim u ah dowladda federaalka Soomaaliya, gaar ahaan dhinacyada amniga iyo horumarinta, iyadoo Ankara ay Muqdisho ku leedahay saldhigga ciidan ee ugu weyn ee ay ku leedahay dibadda. Sidoo kale, labada dal ayaa dhawaan kala saxiixday heshiisyo ku saabsan sahaminta iyo horumarinta tamarta badda Soomaaliya, kuwaas oo la filayo in la bilaabo sanadka 2026.

Madaxweyne Erdogan ayaa horay u sheegay in aqoonsiga Israa’iil ee Somaliland uu yahay tallaabo aan la aqbali karin, isagoo ka digay in ficillada noocaas ahi ay horseedi karaan xasillooni darro cusub iyo is-mariwaa siyaasadeed oo ku fida Geeska Afrika.