Antalya, Turkiga – Dowladda Federaalka Soomaaliya iyo Dowladda Ukraine ayaa si rasmi ah u saxiixay heshiis lagu sameynayo xiriir diblomaasiyadeed intii lagu guda jiray kulan ka dhacay Madasha Diblomaasiyadda Antalya ee dalka Turkiga. Heshiiska waxaa kala saxiixday Wasiiru Dowlaha Arrimaha Dibadda iyo Iskaashiga Caalamiga ee Soomaaliya, Cali Maxamed Cumar, iyo Wasiir Ku-xigeenka Arrimaha Dibadda Ukraine, Andrii Sybiha.
“Maanta, si rasmi ah ayaan u sameysanay xiriir diblomaasiyadeed oo la yeelan doono Soomaaliya,” ayuu Sybiha ku qoray bartiisa X (Twitter hore).
Xiriirkan cusub wuxuu qayb ka yahay dadaalka ay Ukraine ugu jirto inay xoojiso xiriirka ay la leedahay waddamada Afrika. Wasiir Sybiha ayaa sheegay in Ukraine ay horey uga taageertay Soomaaliya dhanka gargaarka cunnada iyadoo loo marayo hindisaha “Grain from Ukraine”, islamarkaana ay diyaar u tahay inay sii waddo taageeradaasi.
Barnaamijkan gargaarka cuntada ee Ukraine wuxuu gaaray 11 dal oo Afrika iyo Bariga Dhexe ah, waxaana Qaramada Midoobay ay sheegtay inuu gacan ka geystay yareynta khatarta cunto la’aanta.
Sybiha ayaa uga mahadceliyay Soomaaliya taageerada joogtada ah ee ay siiso midnimada dhuleed iyo madaxbannaanida Ukraine, gaar ahaan fadhiyada Qaramada Midoobay iyo madalaha caalamiga ah ee kale.
Isagoo ka hadlayay horumarka mustaqbalka, Wasiir Ku-xigeenka Ukraine wuxuu sheegay in dalkiisu uu ka go’an yahay in uu sii xoojiyo iskaashiga uu la leeyahay Midowga Afrika iyo waddamada Afrika si loo gaaro nabad, xasillooni, iyo horumar guud oo gobolka ah.
