Muqdisho, Soomaaliya – Dowladda Federaalka Soomaaliya ayaa si rasmi ah u soo dhoweysay taageerada uu muujiyay Madaxweynaha Mareykanka, Donald Trump, oo ballanqaaday in Mareykanku garab taagan yahay Soomaaliya si ay uga adkaato kooxaha Al-Shabaab iyo Daacish.
Xuseen Sheekh Cali, La-taliyaha Amniga Qaranka ee Soomaaliya, ayaa bartiisa X (hore Twitter) ku bogaadiyay mowqifka madaxweynaha ee ku aaddan taageerada Soomaaliya iyo go’aanka uu ka qaatay la dagaalanka kooxaha Al-Shabaab iyo Daacish, isagoo sheegay in kooxahan ay weli khatar weyn ku yihiin xasilloonida Soomaaliya iyo guud ahaan Geeska Afrika.
“Waxaan ku mahadcelineynaa Madaxweyne Trump mowqifkiisa adag ee ka dhanka ah argagixisada iyo faragelinta dibadda,” ayuu yiri La-taliyaha.
Xuseen Sheekh Cali ayaa intaa ku daray in Soomaaliya ay ka mid tahay saaxiibada ugu firfircoon ee dagaalka caalamiga ah ee ka dhanka ah xagjirnimada. Wuxuu caddeeyay in Soomaaliya iyo Mareykanka ay wadajir uga shaqeynayaan nabadda gobolka iyo danaha amni ee wadajirka ah.
“Wadajir ayaan u ilaalin doonaa xasilloonida gobolka iyo horumarinta danaha amniga wadajirka ah,” ayuu yiri.
Soomaaliya ayaa weli wajahaysa caqabado la xiriira dagaalka ka dhanka ah Al-Shabaab iyo Daacish, kuwaas oo dad badani qabaan in si weyn uga dhigay khatar amni oo ka jirta Geeska Afrika.
