Muqdisho (Dawan)- Halkaan kala soco wararka dunida oo kooban, adiga oo faahfaahinta iyo sheekooyin kale ka heli kara bogaga aan ku leenahay Baraha Bulshada ee Dawan TV.
Mexico-Mareykanka
Wafdi ka socday Mareykanka ayaa la kulmay Madaxweynaha Mexico, Andres Manuel Lopez Obrador si ay uga wada hadlaan wax ka qabashada muhaajiriinta sida sharci darrada ah isaga gudbaaya xudduudadaha ay wadaagaan labada dal iyo xal u helidda dhanka amniga xudduudaha.
Argentine
Kumanaan reer Argentine ah ayaa isugu soo baxay Caasimadda Buenos Aires si ay dhigaan mudaaharaad ay uga soo horjeedaan siyaasadda dhaqaalaha ee uu la yimid Madaxweyne Javier Milei.
Gaza
Madaxa gargaarka ee Qaramada Midoobay ayaa ka digay musiibo caafimaad darro oo ka dhacda Marinka Gaza, maadaama ay isbitaalladi awoodi waayeen in ay bixiyaan adeegyada caafimaad kadib duqeymaha ay Israa’iil ka fulisay Marinka.
Paris
Guddoomiyihii hore ee Guddiga Midowga Yurub, Jacques Delors ayaa ku dhintay gurigiisa oo ku yaal Magaalada Paris, xilli uu hurdayay, Arbacadii isagoo 98 jir ah.
Masar-Suudaan
Masar ayaa Arbacadii ugu baaqday muwaadiniinteeda inay si deg deg ah uga soo baxaan dalka ay dariska yihiin ee Sudaan, sidoo kalena waxa ay mamnuucaday in loo safro xaalad kasta oo jirta.
Ukraine
Madaxweynaha Ukraine, Volodymyr Zelenskyy ayaa sheegay in uu doonayo in uu kor u qaado awoodda dalkiisa, si uu Ruushku u dareensiiyo in ay ka jawaabi karaan duqeymaha uu ku hayo Ukraine.
Mareykanka
Maxkamadda sare ee Gobolka Michigan ee dalka Mareykanka ayaa diiday Arbacdii inay dhageysato dacwad lagu doonayay in Madaxweynihii hore ee Mareykanka Donald Trump looga mamnuuco ka qeyb galka doorashada Madaxtinimada ee 2024-ka.
Kuuriyada Koonfureed
Kuuriyada Koonfureed ayaa Arbacadii sheegtay inay heshiis la saxiixatay Mareykanka si ay uga soo iibsato 20 diyaaradood oo kuwa dagaalka ah.
