Muqdisho (Dawan)- Dawan Media Group (DMG) waxay heshiis is-afgarad ah la saxiixatay Somali Public Agenda (SPA) si loo billaabao wadashqayn cusub oo ku saabsan dhinacayda ay labada hay’adood ka howlgalaan.
Heshiiskan wuxuu hiigsanaya yoolalka waaweyn ee soo socda:
- In la xoojiyo wada shaqeynta u dhexeysa SPA oo leh khibrad cilmi-baaris iyo DMG oo leh saameyn ballaaran oo warbaahineed.
- In la dhiirrigeliyo doodaha waxgalka ah ee ku saabsan maamul wanaagga iyo adeegyada dadweynaha.
- In la sameeyo barnaamijyo wacyigelin dadweyne iyada oo dhinac walba qaadanayo kaalintiisa.
Heshiiska waxa uu sidoo kale diiradda saari doona dhowr arrimood oo muhiim ah ayna ka mid yihiin:
1. Cilmi-Baaris iyo Daabacaad: Faafinta wadajirka ah ee qoraallada iyo warbixinada ku saabsan dowlad wanaagga iyo adeegyada dadwaynaha .
2. Tababaro: Qabashada tababarro iyo aqoon isweydaarsi loogu talagalay saxafiyiinta, cilmi-baarayaasha, iyo bulshada rayidka ah.
3. Doodaha Dadweynaha: Qabanqaabinta kulamo iyo barnaamijyo ku saabsan arrimaha maamulka.
4. Soo Bandhigiidda Cilmi-baarista: Soo bandhigiida natiijooyinka iyo talooyinka cilmi-baarsita ah ee ay sameysay SPA iyadoo la adeegsanayo madallaha DMG.
5. Isweydaarsiga Khibradaha: Wadaagista xogta iyo cilmi-baarista si labada dhinac ay uga qeyb qaataan kobcinta wacyiga dadwaynaha.
Heshiiskan oo socon doona muddo shan sano ah wuxuu muujinayaa sida labada dhinac ay uga go’antahay dhiirrigelinta barnaamjiyada iyo doodaha waxtarka leh ee ku saabsan maamulka iyo kor u qaadista wacyiga bulshada Soomaaliyeed.
