Baku (Dawan)- Muwaadiniinta dalka Azerbaijan ayaa maanta oo Arbaca ah u dareeray doorashada madaxtinimada dalkaas oo laga soo hormariyay xilligii loogu tala galay.
Doorashada waxaa ku tratmaya 7 musharax oo uu ugu horeeyo Madaxweynaha hadda talada haya ee Ilham Aliyev.
Siddeedii subaxnimo ee saacada dalkaas (+4 GMT) waxa bilaabmay codaynta doorashada madaxtooyada, waxaana dalka gudihiisa iyo dibadiisaba lagu diyaariyay 6,500 oo sanduuq.
Sida lagu sheegay xogtii ugu dambeysay ee rasmiga ah, ku dhawaad 6.5 milyan oo qof oo ka diiwaan gashan gudaha dalka ayaa xaq u leh inay ka qeybgalaan doorashada, iyada oo muwaadiniinta dibadda ku nool ay awood u yeelan doonaan inay codkooda ku dhiibtaan sanaadiiqda codbixinta ee loogu talagalay safaaradaha ku yaal dalalka ay ku nool yihiin.
Ilaa 800 oo goob-joogayaal ajaanib ah iyo 90,000 oo goob-joogayaal maxalli ah oo ka kala socda hay’ado iyo dalal kala duwan oo caalami ah ayaa kormeeraya doorashada, waxaana doorashada tebinaya in ka badan 200 oo wariye kuwaas oo ka kala socda warbaahinta dunida.
Cod bixinta ayaa la filayaa in la soo gabagabeeyo todobada fiidnimo ee xiliga dalkaas.
Doorashada waxaa ka qeyb gelaya musharaxa xisbiga New Azerbaijan, ahna Madaxweynaha hadda Ilham Aliyev, madaxa xisbiga National Front Party, Radi Nurulayev, madaxa xisbiga Grand Establishment Party, Fazil Mustafa, iyo madaxa xisbiga Greater Azerbaijan, Elshad. Musayev.
Sidoo kale doorashada waxaa ku tartamaya madaxa xisbiga All-Azerbaijan Popular Front, Kudrat Hasan Guliyev, iyo labada musharax ee madax banaan Zahid Oruc iyo Fuad Aliyev.
Markii ugu horeysay muddo 30 sano ah ayaa sanaadiiqda cod bixinta la dhigay goobihii ay Azerbaijan ka xureysay Armenia ee gobolka Karabakh, si doorasho dalka oo dhan looga qabto.
Doorashadii ugu dambeysay ee madaxtinimo waxa la qabtay 11-kii Abriil, 2018, doorashadana waxaa la qabtaa 7dii sanoba mar, Madaxweyne Aliyev ayaa horay u go’aansaday in doorashada madaxtinimada la soo hormariyo, iyada oo ay marki hore ahayd in la qabto sannadka 2025-ka.
