Dhuusamareeb (Dawan)- Waxaa magaalada Dhuusamareeb ee xarunta maamul goboleedka Galmudug gaaray madaxda dowladda federaalka iyo kuwa dowlad goboleedyada kuwaas oo ka qeyb gelaaya shirka Golaha Wadatashiga Qaran ee dhawaan ka furmi doona magaalada Dhuusamareeb.
Shirka Golaha Wadatashiga Qaran ayaa diiradda lagu saari doona xaaladda amniga dalka, Deyn cafinta iyo dardar-gelinta hawlgallada dalka looga ciribtiraayo dagaalamayaasha Al-shabaab.
Madaxweynaha maamul goboleedka Galmudug Axmed Cabdi Kaariye (Qoor-Qoor) ayaa magaalada Dhuusamareeb kusoo dhaweeyay shalay madaxda ka qeybgaleysa, kuwaas oo kala ah Ra’iisul Wasaare Xamsa Cabdi Barre, ku xigeenkiisa Saalax Axmed Jaamac, guddoomiyaha gobolka Banaadir ahna Duqa magaalada Muqdisho Yuusuf Xuseen Jimcaale (Madaale) iyo madaxweynaha Koofur Galbeed Cabdicasiis Xasan Maxamed (Laftagareen)
Madaxweynayaalka maamul goboleedka Hirshabeele iyo Jubbaland ayaa iyaguna maanta gaaray magaalada Dhuusamareeb ee caasimadda Galmudug.
Madaxweynaha Jamhuuriyadda Federaalka Soomaaliya Xasan Sheekh Maxamuud oo isbuucyadii ugu dambeeyay ku sugnaa Dhuusamareeb ayaa shir guddoomi doona shirka Golaha Wadatashiga Qaran ee la filaayo inuu dhawaan ka billaawdo caasimadda Galmudug.
Madaxweynaha maamul goboleedka Puntland Siciid Cabdullaahi Deni oo ka maqnaa ka qeyb galka shirka Golaha Wadatashiga Qaran muddooyinkii ugu dambeeyay ayaa hadda ku sugan magaalada Nairobi ee dalka Kenya, mana cadda inuu kasoo qeyb geli doono shirka Golaha Wadatashiga Qaran .
Kulanka ay magaalada Dhuusamareeb marti gelineyso ayaa ah kii lixaad oo ay ku kulmaan madaxda dowladda dhexe iyo maamul goboleedyada , tan iyo markii la doortay madaxweyne Xasan Sheekh Maxamuud bishii May ee sannadkii 2022-ka
Waxaa xusid mudan in madaxweyne Xasan Sheekh Maxamuud ku sugnaa magaaalada Dhuusamareeb saddexdii isbuuc ee lasoo dhaafay, isaga oo kulamo kala duwan la yeeshay qeybaha bulshada si loo dardar geliyo dagaalka dowladdu kula jirto xoogaga Al-shabaab.
