6 askari oo ka tirsan Ciidamada nabad ilaalinta u jooga Suudaan oo la dilay

Khartoum, 14 December 2025 (Dawan)- Xoghayaha Guud ee Qaramada Midoobay, António Guterres, ayaa si kulul u cambaareeyay weerar lagu qaaday xarun Qaramada Midoobay ku leedahay dalka Suudaan, halkaas oo lagu dilay lix askari oo ka tirsanaa ciidamada nabad-ilaalinta.

Weerarka oo dhacay Sabtidii ayaa lagu bartilmaameedsaday saldhigga saadka ee ciidamada nabad-ilaalinta Qaramada Midoobay ee magaalada Kadugli, oo ku taalla gobolka Kordofan ee bartamaha Suudaan, sida lagu sheegay bayaan kasoo baxay Xoghayaha Guud.

Siddeed askari oo kale ayaa ku dhaawacmay weerarka, kuwaas oo dhamaantood kasoo dalka Bangaladesh.

“Waxaan si adag u cambaareynayaa weerarrada drone-ka ah ee argagaxa leh ee lagu bartilmaameedsaday saldhigga saadka ee ciidamada nabad-ilaalinta Qaramada Midoobay ee Kadugli, Suudaan,” ayuu yiri Guterres.

Waxa uu intaa ku daray in weerarrada lagu qaaday ciidamada Qaramada Midoobay ay noqon karaan dambiyo dagaal marka loo eego sharciga caalamiga ah, isaga oo ku goodiyay in weerarrada noocan ah aan marna la aqbali karin, isla markaana uu jiri doono isla-xisaabtan.

Ciidanka Suudaan ayaa weerarka ku eedeeyay xoogagga RSF kuwaas oo in ka badan laba sano dagaal kula jira ciidamada dowladda. Ilaa hadda wax war ah kama soo bixin dhinaca RSF.

Ciidanka Suudaan ayaa bayaan uu soo saaray ku sheegay in weerarku uu muujinayo “hab-dhaqan ku dhisan burburin ah” oo ay leeyihiin maleeshiyaadka hubeysan, waxayna baraha bulshada ku baahiyeen muuqaal muujinaya qiiq madow oo ka kacaya goobta la weeraray.

Ra’iisul Wasaaraha ku-meelgaarka ah ee Bangaladesh, Maxamed Yuunus, ayaa isna sheegay inuu aad uga naxay weerarka, isagoo xaqiijiyay in lix askari ay dhinteen, siddeed kalena ay dhaawacmeen. Wuxuu Qaramada Midoobay ka codsaday in la siiyo askarta Bangaladesh gargaarka degdegga ah ee ay u baahanyihiin, isagoo ballanqaaday in dowladdiisu ay garab istaagi doonto qoysaska dhibanayaasha.

Dalka Suudaan ayaa galay fowdo bishii Abriil 2023, kaddib markii khilaaf awood-qaybsi ah uu soo kala dhexgalay ciidamada militariga dowladda iyo RSF kaas oo isku beddelay dagaal sokeeye, oo sababay dhimashada in ka badan 40,000 oo qof, inkastoo hay’adaha xuquuqda aadanaha ay sheegayaan in tiradu ka badan karto intaas.

Dagaalka ayaa sababay burbur ballaaran, tacaddiyo ka dhan ah xuquuqda aadanaha iyo dilal ku saleysan aano qabiil.

Weerarkan ayaa imanaya bil kaddib markii Golaha Ammaanka ee Qaramada Midoobay uu cusboonaysiiyay howlgalka nabad ilaalinta ee UNISFA muddo hal sano ah.