75 sano kadib, Dadka Muqdisho oo lagu qiyaasay 36 Milyan

Muqdisho 17 December 2025 (Dawan)– Saadaalin ay soo saartay Madasha Dhaqaalaha Adduunka ayaa muujinaysa in tirada dadka ku nool caasimadda Soomaaliya ee Muqdisho ay sanadka 2100 gaari doonto illaa 36.4 milyan oo qof.

Saadaashan ayaa Muqdisho ka dhigaysa mid ka mid ah magaalooyinka Afrika ugu dadka badan, iyadoo la filayo inay ka hormarto Addis Ababa oo lagu qiyaasay 35.8 milyan oo qof. Sida saadaasha lagu sheegay, Muqdisho waxa ay ka dad yaraan doonta kaliya caasimadaha dalalka Masar iyo Kenya ee Qaaahira iyo Nairobi, arrintaas oo sare u qaadaysa doorka caasimadda Soomaaliya ee dhinacyada dhaqaalaha iyo siyaasadda gobolka.

Saadaashan oo markii ugu horreysay ay Madasha Dhaqaalaha Adduunka soo saartay sannadkii 2018, ayaa mar kale dib loo soo qaatay loona xoojiyay xog ay daabacday hay’adaha caalamiga ah ee tirakoobka dadka.

Xilligan, tirada dadka ku nool Muqdisho waxaa lagu qiyaasaa inta u dhaxaysa 3 ilaa 4 milyan. Marka loo eego xisaabtan la sameeyay, koboca dadka ee caasimadda ayaa la filayaa inuu gaaro celcelis ahaan 432 kun oo qof sannadkii.

Dhanka horumarka, khubaradu waxay tilmaamayaan in Muqdisho ay fursad u leedahay inay mustaqbalka noqoto magaalo saameyn muuqata ku leh magaalooyinka waaweyn ee Afrika iyo caalamka, isla markaana door weyn ka qaadata dhaqaalaha iyo siyaasadaha Geeska Afrika.

Haddii si qorsheysan loo maareeyo koboca dadka, loo xoojiyo maalgashiga kaabayaasha dhaqaalaha, lana hormariyo adeegyada aasaasiga ah, Muqdisho waxay heli kartaa fursad ay ku noqoto magaalo casri ah oo si waxtar leh u wajahda caqabadaha qarniga 21-aad.