AFRICOM oo sheegtay in labo duqeymo uu la beegsaday al Shabaab

Muqdisho (Dawan) – Taliska Ciidamada Maraykanka ee Afrika (AFRICOM) ayaa sheegay in ay fuliyeen laba duqeyn oo ka dhan ah al Shabaab, iyagoo sheegay inay la kaashadeen Dowladda Federaalka Soomaaliya.

Bayaan kasoo baxay AFRICOM 1-dii Sebteembar ayaa lagu sheegay in weerarradu dhaceen 30-kii Agoosto 2025. Taliska ayaa sheegay in mid ka mid ah duqeymaha uu ka dhacay Jubbaland, qiyaastii 40 km waqooyi-bari kaga beegan magaalada Kismaayo, halka duqeynta kale lagu fuliyay gobolka Shabeelle, ku dhowaad 50 km koonfur-galbeed kaga beegan Muqdisho.

AFRICOM waxa ay sheegtay in howlgaladan lagu fuliyay iskaashi lala yeeshay Ciidanka Xoogga Dalka Soomaaliyeed, ujeeddaduna tahay in la wiiqo awoodda al Shabaab ee weerarada ka geysta gudaha Soomaaliya iyo meelaha ka baxsan.

“AFRICOM, iyadoo kaashaneysa Dowladda Federaalka Soomaaliya iyo Ciidamada Soomaaliyeed, waxay sii wadaysaa ficillada lagu wiiqayo awoodda al Shabaab ee khatarta ku ah Mareykanka, ciidamadeenna, iyo muwaadiniinteena dibadda ku sugan,” ayaa lagu yiri qoraalka.

Taliska kama bixin faahfaahin ku saabsan cutubyada iyo qalabka la adeegsaday, sababo la xiriira amniga howlgalka, waxaana sidoo kale aan la helin xaqiijin madax-bannaan oo ku saabsan khasaaraha ka dhashay duqeymahaas.

Mareykanka ayaa si joogto ah u shaaciya duqeymo uu ku taageerayo ciidamada Soomaaliya iyo kuwa Midowga Afrika, inkastoo xaqiijinta madax-bannaan ee beegsiyada iyo natiijooyinka ay inta badan xaddidan tahay