Al-Alamein (Dawan) – Madaxweynaha dalka Masar, Abdel Fattah El-Sisi, ayaa ballanqaaday in dowladdiisu ay sii xoojin doonto wada shaqeynta ay la leedahay Soomaaliya si loo gaaro nabad, horumar iyo xasillooni guud ahaan Soomaaliya, Geeska Afrika, iyo gobolka badda Cas.
Wuxuu hadalkaan ka jeediyay shir jaraa’id uu la qabtay Madaxweynaha Soomaaliya Xasan Sheekh Maxamuud, kadib kulan rasmi ah oo ay ku yeesheen magaalada Al-Alamein.
Kulammo Laba Geesood ah oo Sare
Sida ay sheegtay madaxtooyada Masar, kulanka ayaa ku bilowday wadahadal gaar ah oo dhexmaray labada madaxweyne. Waxaa xigay kulan ballaaran oo ay ka qeybgaleen masuuliyiin sare oo ka kala socday labada dowladood.
Wadahadalladaasi waxay diiradda saareen arrimo ay ka mid yihiin amniga gobolka, siyaasadda, iyo xoojinta xiriirka laba geesoodka ah.
Masar oo Taageeraysa Dib-u-dhiska Soomaaliya
Kulanka wuxuu sidoo kale daaranaa dhowr arrimood oo muhiim ah. Waxaa ka mid ahaa taageerada Masar ee dadaallada Soomaaliya ku dooneyso inay ku xasiliso gudaha, geeddi-socodka dib-u-heshiisiinta, iyo dib-u-dhiska hay’adaha dowladda.
Sidoo kale, labada madaxweyne waxay ku celceliyeen sida ay uga go’an tahay dhaqan-gelinta Heshiiska Iskaashiga Milatari ee la saxiixay Agoosto 2024. Heshiiskaasi wuxuu ujeedkiisu yahay in lagu taageero ciidamada qalabka sida iyo booliiska Soomaaliya si ay u sugaan amniga, una fidiyaan maamul dowladeed oo rasmi ah.
Midowga Afrika iyo Maalgelin Caalami ah
Dhanka kale, labada hoggaamiye waxay si gaar ah u falanqeeyeen doorka Masar ee howlgalka cusub ee Midowga Afrika ee Soomaaliya. Waxay carabka ku adkeeyeen in howlgalkaasi u baahan yahay maalgelin joogto ah oo caalami ah.
Xiriir Diblumaasiyadeed oo Sii Kordhaya
Madaxtooyada Soomaaliya ayaa dhankeeda sheegtay in Madaxweyne Xasan Sheekh uu bogaadiyay doorka Masar ee ku aaddan taageerada Soomaaliya. Gaar ahaan waxaa la tilmaamay dhinacyada amniga, waxbarashada, caafimaadka, iyo iskaashiga milatari.
Ugu dambeyn, Madaxweyne El-Sisi wuxuu ku ammaanay Madaxweyne Xasan Sheekh dadaalladiisa mideynta shacabka iyo horumarinta wadahadallada siyaasadeed. Booqashadani oo ahayd tii labaad ee Madaxweyne Xasan uu ku tago Masar sanadkan 2025, ayaa loo arkaa tallaabo lagu xoojinayo iskaashiga labada dal, xilli uu gobolka wajahayo caqabado siyaasadeed iyo amni.
