Muqdisho, Soomaaliya (Dawan ) – Xubnaha Baarlamaanka Jamhuuriyadda Federaalka Soomaaliya ayaa maanta loo qeybiyay warbixinta soojeedimaha wax-ka-beddelka cutubyada shanaad ilaa sagaalaad ee Dastuurka, sida lagu sheegay war qoraal ah oo ka soo baxay Golaha Shacabka, xilli kulanka uu ku dhammaaday buuq isku beddelay gacan ka hadal.
Kulanka, oo ay si wadajir ah u shir-guddoominayeen Guddoomiyaha Golaha Shacabka Sheekh Aadan Maxamed Nuur (Madoobe) iyo Guddoomiye Ku-xigeenka Koowaad ee Golaha Aqalka Sare Cali Shacbaan Ibraahim, ayaa waxaa ka qeyb galay 180 xildhibaan oo ka tirsan Golaha Shacabka iyo 31 senator oo ka socda Aqalka Sare.
Guddoomiyaha Golaha Shacabka ayaa xildhibaanada ku wargeliyay in ay si taxaddar leh u akhriyaan soojeedimaha iyo warbixinta la qeybiyay, si ay dood rasmi ah uga yeeshaan. Hase yeeshee, kulanka ayaa waxaa hareeyay buuq, iyadooqaar ka mid ah xildhibaanada ay isku gacan qaadeen.
