Baraawe (Dawan)- Sannado badan oo isagu jira jarista dhirta iyo ka baayac mushtarka dhuxusha, waxey dalkeena Soomaaliya dhaxlsiisay inuu noqdo goob ka caagan deegmaysi lagu noolaan karo.
Dhibaatada is beddelka cimilada ayaa aafo weyn ku ah in ka badan 35,000, oo ku nool magaalada Baraawe kuwaas oo guryahahoodi duugay Bacaad.
Dadka deegaanka aaya sheegay in ciidda ka timaada dhanka xeebta ay saameyn weyn ku yeelatay noloshooda deegaaneed iyo qaab dhismeedka guryaha magaalada Baraawe.
Jarista iyo gubista geedaha, fallista cowska iyo fahan la’aanta dadka ka heysata isbeddelka cimilada ayaa loo sababeynaya in Bacaadku halis geliyo nolosha dadka deggan magaalada Baraawe oo wajaheysa mid ka mid ah dhibaatooyinka isbeddelka cimilada.
Qashinka oo lagu daadiyo xeebaha, guryo ay baddu liqday iyo kuleyl aan dabiici ahayan ayaa sidoo kale magaalada Baraawe kusoo batay, waana astmaaha isbeddelka cimilada ee dunidu maanta kula jirto loollanka adag.
Bacaadka ayaa dhibaato ku weyn ku ah dhaxalka jiilal badan, kadib markii uu xabaalay ceelashii biyaha laga cabi jiray magaalada Baraawe ee gobolka Shabeellaha Hoose
Dadka deegaanka ayaa sheeegay in Bacaadku dhibaato weyn ku haayo Baraawe maadama uu yaraaday roobkii ka da'i jiray magaalada sannadihii lasoo dhaafay, waxeyna ka codsadeen mas’uuliyiinta dowladda iyo hay’adaha caalamaiga inay wax ka qabtaan dhibaatada kusoo badaneysa dadka deggan Baraawe.
Wasiiradda Deegaanka iyo Isbedelka Cimilada Khadiija Maxamed Al-makhzoumi ayaa booqasho u guur gelid ah ku tagtay magaalada Baraawe, waxeyna dadka deegaanka ka dhegeysatay warbixino la xiriira dhibaatada iyo saameynta uu Baacadku ku yeeshay magaalada.
Wasiir Khadiija ayaa sheegtay in wax laga qabanaayo Bacaadka iyo dhibaatooyinka kale ee isbeedellada cimiladu sababeen, iyada oo laga shaqeyn doono sidii loo samyn lahaa Bcaad celin, beerista geedaha iyo qor u qaadis loo sameynaayo wacyiga dadka Soomaaliyeed si ay uga hor tagaan dhibaatada isbeddelka cimilada.
Wasiiradda ayaa tiri “ Bacaadka waa halista ugu weyn ee ay Baraawe wajaheyso. Jiritaanka deegaanka iyo nolosha bulshada ku nool waxay ku xiran tahay sida aan wax uga qabano ka hortaga bacaadka aasaya magaalada iyo deegaannada ku hareeeysan"
Wasiiradda iyo mas’uuliyiinta kale ee maamul goboleedka Koonfur Galbeed oo fulinaaya qorsahda Soomaali cagaaraan ayaa geedo ku abuuray magaalada Baraawe si loo baajiyo dhibaatada iyo aafooyinka isbeddelka cimilada ee kusoo wajahan dadka iyo deegaanka magaalada.
Madaxweynaha Jamhuuriyadda Federaalka Soomaaliya Xasan Sheekh Maxamuud ayaa daah furay sannadkii hore qorshaha Qaran ee Soomaaliya cagaar ah, kaas oo ah in la beero 10 Malyan oo geed si loo dhireeyo dalka logana hor tago isbeddelka cimilada.
Wasaaradda Deegaanka iyo Isbeddelka Cimilada ayaa daal badan ku bixisay badbaadinta deegaanka iyo duunyada iyada oo ka duuleysa barnaamijka Soomaliyada cagaaraan si looga hor tago aafooyina isbedelka cimilada
Golaha aqalka sare ayaa dhawaan meel mariyay xeerka ilaalinta iyo maareynta deegaanka oo ay wasaaraadu soo gudbisay kaas oo wax badan ka tari doona arrimaha deegaanka.
Wasiiradda Deegaanka iyo Isbeddelka Cimilada Khadiija Maxamed Al-makhzoumi ayaa ka mahadcelisay meel marinta xeerka, waxeyna hoosta ka xariiqday in sharcigaan awood u siin doono ilalinta deegaanka iyo nolosha dadka
Wasiiradda ayaa intaas ku dartay in sharcigaan yahay bud-dhigga nidaam isla xisaabtan oo xakameynaya xaalufinta iyo wasaqeynta deegaanka.
