Jabuuti , 21 September 2025 – Ciidamada amniga Jabuuti ayaa Jimcihii gubay in ka badan 6,000 kiilo oo qaad sharci-darro ah, sida ay sheegtay warbaahinta dowladda, kadib markii lagu qabtay laba hawlgal oo ka kala dhacay gobollada Cali Sabiix iyo Diqil.
Warbaahinta dowladda ayaa ku warrantay in gobolka Cali Sabiix, waaxda canshuuraha gobolka iyo ciidamada amniga ay qabteen 5,000 kiilo oo qaad ah oo lagu waday in loo gudbiyo caasimadda Jabuuti. Qaadkaas ayaa isla goobtii lagu gubay, iyadoo uu goob-joog ahaa agaasimaha waaxda canshuuraha gobolka, Maxamed Muumin Xasan.
Sidoo kale, warbaahinta ayaa sheegtay in gobolka Diqil lagu qabtay 1,350 kiilo oo qaad sharci-darro ah oo ka soo galay dhanka Itoobiya. Qaadkaas ayaa isla goobtii lagu gubay, maadaama lagu soo geliyay waddanka si aan waafaqsaneyn xeerarka dalka.
Warbaahinta dowladda Jabuuti ayaa intaas ku dartay in tallaabooyinkan ay qeyb ka yihiin dadaallada dowladda ee lagu xakameynayo qaadka sharci-darrada ah iyo guud ahaan ganacsiga dhuumaaleyska ah ee waddanka lagu soo geliyo.