Ciidamada Jubaland oo loo tababarayo ka hortagga qaraxyada

Kismaayo – 8 Janaayo 2026 (Dawan)- Howlgalka xasilinta Soomaaliya ee Midowga Afrika (AUSSOM) ayaa magaalada Kismaayo ka bilaabay tababar ku saabsan ka hortagga walxaha qarxa ee macmalka ah , kaas oo la siinayo Ciidanka Ammaanka Jubaland, si loo xoojiyo amniga loona taageero xilliga kala-guurka hawlgallada amni ee ay hoggaaminayaan ciidamada Soomaaliya

Tababarkan oo socon doona muddo toddobaad ah, ayaa diiradda saaraya baarista waddooyinka, ogaanshaha, iyo saarista walxaha qarxa , iyadoo si gaar ah loo xoojinayo badbaadada hawlgallada ciidanka ee ka dhanka ah khataraha amni . Barnaamijkan waxaa si wadajir ah u fulinaya AUSSOM iyo Adeegga Miino-baarista Qaramada Midoobay (UNMAS).

Sida lagu sheegay bayaan ay AUSSOM ku baahisay barteeda rasmiga ah ee Facabook, tababarkan ayaa qayb ka ah istiraatiijiyad ballaaran oo lagu dhisayo awoodda ciidamada Soomaalida si ay ula wareegaan mas’uuliyadda sugidda amniga, gaar ahaan deegaannada halista badan.

Gaashaanle Sare Galgalo Liban, oo si rasmi ah u furay barnaamiika, ayaa sheegay in tababarkan uu yahay tallaabo muhiim ah oo lagu taageerayo la wareegidda Soomaaliya ee hoggaaminta hawlgallada amniga. Wuxuu xusay in walxaha qarxa ay yihiin mid ka mid ah caqabadaha ugu waaweyn ee hortaagan xasilloonida iyo dhaqdhaqaaqa ciidamada iyo shacabka.

Tababarka waxaa bixinaya khubaro ku takhasusay qaraxyada oo ka tirsan AUSSOM, gaar ahaan Ciidanka Difaaca Kenya. Dufcadda koowaad ayaa ka kooban 16 askari oo ka tirsan Ciidanka Ammaanka Jubaland, iyadoo la qorsheeyay in saddex dufcadood oo kale ay qaataan tababarkan toddobaadyada soo socda.

Dhankiisa, Gaashaanle Sare Bashiir Guhaad, Taliyaha Hawlgallada ee Ciidanka Daraawiishta Jubaland, ayaa uga mahadceliyay AUSSOM iyo UNMAS taageerada ay siinayaan ciidamada dowlad goboleedka Jubbaland. Wuxuu sheegay in tababarkani uu xoojinayo “xal u helidda caqabadaha jira, isla markaana uu gacan ka geysan doono kordhinta xorriyadda dhaqdhaqaaqa iyo xaqiijinta amni waara oo ka hana qaada Jubaland.