Muungaab oo sheegay in aan la hor istaagi karin horumarka Muqdisho

Muqdisho (Dawan ) – Guddoomiyaha Maamulka Gobolka Banaadir ahna Duqa Magaalada Muqdisho, Xasan Maxamed Xuseen (Muungaab), ayaa sheegay in dacaayad, qaylo, iyo hadallo siyaasadeed oo uu ku tilmaamay “raqiis” aysan marnaba joojin karin horumarka, bilicda, iyo jihada ay u socoto caasimadda.

Muungaab ayaa hadalkan ka sheegay munaasabad uu shalay xarigga kaga jaray Xarunta Maamulka Degmada Wadajir, oo dib-u-dhis iyo casriyeyn lagu sameeyay. Wuxuu xusay in horumarka ka socda Muqdisho uu ku saleysan yahay rabitaanka shacabka, nabadgelyada jirta, iyo shaqada ay hayaan hay’adaha dowladda hoose.

Duqa Muqdisho ayaa carrabka ku adkeeyay in caasimaddu ka gudubtay marxaladihii hore, islamarkaana aysan aqbalayn in dib loogu noqdo hannaan siyaasadeed ama doorasho aan ahayn mid toos ah oo ku dhisan codka shacabka. “Muqdisho waa hooyada ummadda Soomaaliyeed, waana tusaalaha magaalooyinka kale. Waxay dooratay horumar, nabad, iyo doorasho qof iyo cod ah,” ayuu yiri.

Muungaab ayaa sidoo kale ammaanay doorka ay ciidamada amniga ka qaateen sugidda nabadgelyada caasimadda, isagoo xusay in xasilloonida jirta ay fure u tahay horumarinta adeegyada bulshada, dhismaha hay’adaha degmooyinka, iyo diyaar-garowga doorashooyinka soo socda.

Hadalkan ayaa imanaya xilli ay jiraan dooddo siyaasadeed oo la xiriira jihada doorashooyinka dalka, iyadoo maamulka Gobolka Banaadir uu marar badan ku celiyay in Muqdisho ay sii wadi doonto waddada horumarka iyo dimuqraadiyadda, islamarkaana aysan dib ugu laaban doonin wax uu ku tilmaamay “dib-u-socod siyaasadeed.”