Q/Midoobay oo ka walaacsan natiijo la’aanta wada-hadallada dowladda iyo mucaaradka

Soomaaliya, 23 Febraayo 2026 (Dawan)– Hawlgalka Kaalmaynta Ku-meel-gaarka ah ee Qaramada Midoobay ee Soomaaliya (UNTMIS) ayaa maanta oo Isniin ah sheegay inuu ka xun yahay fashilka wada-hadalladii u dhexeeyay Dowladda Federaalka Soomaaliya iyo isbahaysiga mucaaradka ee Golaha Mustaqbalka Soomaaliya, kuwaas oo lagu doonayay in lagu gaaro heshiis siyaasadeed.

xafiisku waxa uu labada dhinac ku boorriyay inay sii wadaan wada-hadalka si niyad-sami ah.

Qoraal kasoo baxay xafiiska UNTMIS ayaa lagu sheegay inhoggaanka xafiiska, oo ay weheliyaan saaxiibbada caalamiga ah, inay kulamo la qaateen wakiillo sare oo ka socday Dowladda Federaalka iyo Golaha Mustaqbalka Soomaaliya, kaddib markii ay istaageen wada-xaajoodyadii.

Qaramada Midoobay waxay sheegtay inay soo dhowaynayso ballan-qaadka ay muujiyeen labada dhinac ee ah inay sii wadaan dadaallada lagu doonayo in xal loogu helo arrimaha siyaasadeed ee taagan.

“UNTMIS iyo saaxiibbadeennu waxaan diyaar u nahay inaan gacan ka geysanno dadaallada Soomaalida ee lagu raadinayo tanaasul laga gaaro arrimaha weli taagan,” ayaa lagu yiri bayaanka, iyadoo lagu daray in hay’addu ay sii wadi doonto taageerada dadaallada ay Soomaalidu hoggaaminayso.

Wada-hadallada fashilmay ayaa qayb ka ah dadaallada socda ee lagu xallinayo khilaafaadka la xiriira wax-ka-beddelka dastuurka iyo maaraynta hannaanka doorashooyinka, kuwaas oo kordhiyay walaaca laga qabo hubanti la’aanta siyaasadeed ee dalka.