Ciidamo Turki ah oo markii ugu horeysay si toos ah uga qeyb qaatay dagaal ka dhan ah AS

Muqdsho (Dawan)- Ciidamo Turki ah ayaa markii ugu horeysay si toos ah uga qeyb qaatay dagaal gudaha Soomaaliya oo ka dhan ah Al-shabaab, iyagoo ka caawiyay ciidamada Gorgor ee Soomaaliya sidii ay uga hortagi lahaayeen weerar ay soo qaaday kooxda. Dagaalka, oo socday muddo saddex saacadood ah, ayaa ka dhacay deegaanka Jabad Godane, oo ku dhow degmada Warsheekh ee gobolka Shabeellaha Hoose oo loo qorsheeyay in Turkigu ka dhiso xarun laga tuuro dayax gacmeed.

Ciidamada Turkiya oo tobaneeyo ah oo wata dabbaabado iyo hub casri ah ayaa dagaalka ka qeyb qaatay dagaalka, taas oo taageero muhiim ah siisay ciidamada Soomaaliya ee dagaalka la galay Al-Shabaab. Dadka deegaanka iyo mas’uuliyiin ka tirsan ciidanaka xoogga Soomaaliya ayaa Dawan u xaqiijiyay in ciidamada Al-Shabaab ee weerarka soo qaaday ay dib ugu laabteen deegaanka Xawaadleey ee ku dhow Jabad Godane.

Jabad Godane, oo horey uga dhaceen iska hor imaadyo iyo dagaallo u dhaxeeya ciidamada dowladda iyo Al-shabaab, ayaa sidoo kale ku dhow goobta la qorsheynayo in laga dhiso xarunta dayax-gacmeedyada ee Turkigu ka hirgelinayo Soomaaliya.

Wararka ayaa sheegaya in dowladda Turkigu ay dooneyso inay xaqiijiso amniga goobaha ku dhow xarunta dayax-gacmeedyada si aan loo carqadladayn habsami u socodka howlaha la xiriira dayax-gacmeedka. Qiyaasti boqolaal km oo isku wareeg ah ayay Turkidu qorsheyneysaa in amaankeeda sugaan si aysan khatar uga imaan qalabka xarunta. Goobtan ayaa muhiim u ah mashaariicda dayax-gacmeedyada ee Turkiga ee Soomaaliya.

Iskaashiga amni ee ka dhexeeya Soomaaliya iyo Turkiya ayaa noqday mid sii xoogeysanaya. Tan iyo markii labada dal ay saxiixeen heshiisyo amni iyo horumarineed, waxaa sii kordhay taageerada ciidamada Turkiya ee tababarka, qalabka, iyo teknoolojiyada si loo xoojiyo amniga Soomaaliya. Dagaalkan ayaa muujinaya doorka sii kordhaya ee Turkiya ee gudaha Soomaaliya iyo gobolka.

Jabad Godane ayaa noqon doonta deegaan muhiim u ah Turkiga iyo Soomaaliya, maadaama ay ku dhowdahay goobaha laga fulinayo mashaariicda waawayn ee dalka Turkigu ka hirgelinayo Soomaaliya.