Ciraaq: Aqoonsiga Israa’iil ee Somaliland waa xadgudub ka dhan ah sharciga caalamiga ah

Bağdaad – 27 Diseembar 2025 (Dawan) – Dowladda Ciraaq ayaa si kulul u cambaareysay aqoonsiga Israa’iil ay siisay Somaliland, iyadoo ku tilmaantay tallaabadaas mid si cad u jebinaysa sharciga caalamiga ah iyo Axdiga Qaramada Midoobay, isla markaana ah ku xadgudub halis ah oo ka dhan ah madax-bannaanida dowladaha.

War-saxaafadeed ay soo saartay Jimcihii, Ciraaq—oo haatan ah guddoomiyaha wareega ee Jaamacadda Carabta—ayaa sheegtay in ay u aragto ku dhawaaqista Israa’iil mid si toos ah u dhaawacaysa madax-bannaanida iyo midnimada dhuleed ee Jamhuuriyadda Federaalka Soomaaliya, isla markaana wiiqaysa dadaallada lagu ilaalinayo amniga iyo xasilloonida gobolka.

Qoraalka ayaa intaas ku daray in tallaabooyinka sharci-darrada ah ee noocan ah ay khatar toos ah ku yihiin xasilloonida Geeska Afrika, kana qeyb qaadan karaan sii kicinta xiisadaha gobolka, taas oo si taban u saameyn karta nabadda iyo amniga caalamiga ah.

Wasaaradda Arrimaha Dibadda ee Ciraaq ayaa mar kale xaqiijisay taageerada Bağdaad ee madax-bannaanida dowladaha iyo midnimada qaran, iyadoo si buuxda u diiday wax kasta oo isku day ah oo lagu abuurayo xaalad qalalase oo ka hor imaanaysa rabitaanka ummadaha.

Ciraaq ayaa sidoo kale ugu baaqday beesha caalamka, iyo ururo goboleedyada iyo kuwa caalamigaah, in ay gutaan waajibaadkooda sharci iyo akhlaaqeed, iyagoo qaadaya mowqif cad oo ka dhan ah tallaabooyinkan sharci-darrada ah, si loo ilaaliyo sharcinimada caalamiga ah loona dhowro madax-bannaanida dalalka xubnaha ka ah.