Cirro oo isbedel ku sameeyay guddoomiyayaasha 5 gobol

Hargeysa, 11 December, 2025 (Dawan)- Madaxweynaha Somaliland, Cabdiraxmaan Maxamed Cabdillaahi (Cirro), ayaa Arbacadii ku dhawaaqay is bedel kooban oo lagu saameysay maamulka gobollada , isagoo xilalkii ka qaaday Guddoomiyayaashii gobollada Awdal, Saaxil, Sanaag, Daadmadheedh iyo Salal.

Gobolka Awdal: Madaxweynaha ayaa xilka ka qaaday Muxumed Xasan Jaamac (Hoday), wuxuuna u magacaabay Cabdirashiid Xasan Mataan.

Gobolka Saaxil: Waxaa xilka laga qaaday Maxamed Daahir Cabdalla Gaafane, waxaana lagu beddelay Cabdiqani Maxamuud Caateeye Fariid.

Gobolka Sanaag: Axmed Cabdi Muuse ayaa xilka laga qaaday, waxaana loo magacaabay Maxamuud Raage Ibraahin Guuleed.

Gobolka Daadmadheedh: Cabdiraxiin Maxamed Axmed ayaa xilka laga qaaday, waxaana guddoomiyaha cusub loo magacaabay Cabdiraxmaan Maxamed Cabdi (Herer).

Gobolka Salal: Axmed Cabdillaahi Maxamed (Dhegayare) ayaa loo magacaabay guddoomiyaha cusub.

Isbeddelladan ayaa sidoo kale saameeyay hay’adaha Somaliland, iyadoo Haybe Cismaan Muuse, oo xubin ka ahaa Guddiga Tacliinta Sare, laga qaaday xilka laguna beddelay Cabdi Siciid Faahiye Allaale.

Wareegto kasoo baxday Madaxtooyada Somaliland ayaa lagu bogaadiyay mas’uuliyiintii xilalka laga qaaday, halka kuwa cusub lagu amray inay xilka kula wareegaan muddo saddex maalmood gudahood ah, si aan hakad ugu imaan howlaha maamulka gobollada.