Hargeysa (Dawan)– Madaxweynaha Somaliland Cabdiraxmaan Maxamed Cabdillaahi “Cirro” ayaa Jimcihii ku eedeeyay dowladda federaalka Soomaaliya inay diyaarinayso weerar ka dhan ah Somaliland, isagoo sheegay in ciidamo iyo hub loo daabulayo magaalada Laascaanood, kuwaas oo uu ku andacooday inay taageero ka helayaan diyaarado laga leeyahay dalka Turkiga.
Isagoo ka hadlayay kulan ka dhacay Hargeysa, Cirro wuxuu sheegay in waxa uu ku tilmaamay abaabul ciidan oo ka socda Muqdisho uu halis gelinayo xasilloonida gobolka, isla markaana uu ugu baaqay saaxiibada caalamka inay ka fogaadaan tallaabooyin uu ku sifeeyay faragelin.
“Dowladda Soomaaliya waxay wadaa duullaan ay ku soo qaado Somaliland. Diyaarado laga leeyahay dalka Turkiga ayaa ciidamo iyo hub u daabulaya Laascaanood,” ayuu yiri Cirro, isagoo intaas ku daray in hadallo uu sheegay inuu jeediyay Madaxweynaha Soomaaliya Xasan Sheekh Maxamuud ay muujinayaan qorshe lagu doonayo in Somaliland dib loogu soo celiyo maamulka Muqdisho.
