Hargeysa, 21 October 2025 (Dawan) — Madaxweynaha Somaliland, Cabdiraxmaan Maxamed Cabdillaahi (Cirro), ayaa xalay gurigiisa kulan kula yeeshay culimada Somalilan, isaga oo uga warramay xaaladda arimaha dibadda ee ictiraaf raadinta, nabadda Ceerigaabo iyo Horumarinta arimaha Bulshada.
Madaxweyne Cirro ayaa culimada uga warbixiyay geeddi-socodka siyaasadda arrimaha dibadda, dedaallada ay xukuumaddiisu wado oo ay ku dooneyso in ay aqoonsi caalami ah ku keento, iyo natiijooyinka ka soo baxay safarradii shaqo ee uu ku tegay Imaaraadka Carabta iyo Itoobiya, kuwaas oo uu ku tilmaamay kuwo miro dhal ah oo lagu xoojiyay xiriirada diblomaasiyadda, iyo ganacsiga.
Sidoo kale, Madaxweyne Cirro ayaa culimada la wadaagay xog ku saabsan hab-sami-u-socodka gogosha nabadda ee Ceerigaabo, isaga oo sheegay in dedaallada nabaddu ay si wanaagsan u socdaan, isla markaana uu ka codsaday culimada in ay u duceeyaan in nabaddaasi ay guulaysato. Sida lagu sheegay bayaanka ka soo baxay Xafiiska warfaafinta madaxweynaha Somaliland.
Kulankan ayaa loo arkaa mid muuniya xiriirka dhow ee u dhexeeya hoggaanka Somaliland iyo culimada deegaanka, kuwaas oo hadii ay si wadajir ah ugu wada shaqeeyaan dadaallada nabada, xal waara laga gaari karo dagaaldda deeganada Somaliland ka dhaco.