Dab geystay khasaare hantiyadeed oo ka kacay xaafado ka tirsan caasimadda Jabuuti

Jabuuti, 13 Janaayo 2026 (Dawan)— Dab xooggan ayaa galabnimadii Talaadada ka kacay xaafado ka tirsan caasimadda Jabuuti, kaas oo gubay guryo badan isla markaana khasaare hantiyeed geystay, iyadoo mas’uuliyiintu sheegeen in nidaamyada tamarta qorraxda laga dhaliyo ay suuragal tahay inay sii xoojiyeen dabka.

Dabkii ka biloowday xaafadda Ambouli, ayaa sababay qiiq madow oo cirka isku shareeray, taas oo cabsi gelisay dadka deegaanka, maadaama dabku si degdeg ah ugu faafay guryaha isku dhow ee ku yaalla aagga xeebta.

Agaasimaha Hawlgallada Difaaca Madaniga, Maxamuud Muuse Maxamuud, ayaa sheegay in baaritaanno hordhac ah ay muujinayaan in baytariyo nuuca loo yaqaano lithium ah iyo qalab qorraxeed oo ku rakibnaa mid ka mid ah guryaha ay door ka ciyaareen xooga dabka, isla markaana fududeeyeen ku fidiitaankiisa guryaha deriska ah.

Dab kale ayaa sidoo kale ka kacay degmooyin kale oo ka tirsan magaalada, kuwaas oo sababay burbur soo gaaray ugu yaraan lix guri, sida ay sheegeen mas’uuliyiinta. Baaritaannada ayaa weli socda si loo ogaado sababta rasmiga ah ee dhalisay dabkaas.

Mas’uuliyiintu waxay xaqiijiyeen in aysan jirin wax dhimasho ama dhaawac ah oo ka dhashay dhacdooyinkan.

Illaa hadda lama xaqiijin in labada dab ay wadaagaan hal sabab oo guud, sida cillad koronto, hase yeeshee hay’adaha ammaanka iyo dab-damiska ayaa ku boorriyey dadweynaha in ay taxaddar dheeraad ah muujiyaan, gaar ahaan isticmaalka nidaamyada qorraxda iyo kaydinta tamarta.