Addis Ababa, 15 December 2025 (Dawan)- Dowladaha Jabuuti iyo Itoobiya iyo shirkadda Emirates National Oil Company Group , ayaa ka wada hadlay sidii dib loogu hawlgelin lahaa tareenka qaada shidaalka la sifeeyay ee isku xira Terminalka Doraleh ee Jabuuti iyo bakhaarada shidaalka ee Awash ee Itoobiya.
Kulanka, oo ka dhacay magaalada Addis Ababa, 13 December 2025 , oo ay goob joog ahaaayeen Wasiirka Tamarta Jabuuti, Yoonis Cali Geedi, iyo Wasiirka Maaliyadda Itoobiya, Axmed Shide, ayaa diiradda lagu saaray muhiimadda dib-u-hawlgelinta tareenkan oo ah mid laf-dhabar u ah ganacsiga iyo gaadiidka shidaalka ee labada dal.
Inkasta oo uusan kulanku ku dhammaan heshiis rasmi ah, haddana waxaa si qoto dheer looga dooday dib-u-soo-nooleynta heshiisyadii ganacsi iyo farsamo ee suurta gelinaya in shidaalka laga soo dejiyo dekedda Doraleh loona gudbiyo Itoobiya iyadoo la adeegsanayo tareenka. Wadahadalladu waxay xoogga saareen arrimaha maaliyadda, qaab-dhismeedka kharashaadka, iyo qiimeynta adeegga.
Haatan, shidaalka laga keeno Jabuuti ee taga Itoobiya waxaa inta badan lagu qaadaa gaadiidka xamuulka qaada, balse mas’uuliyiintu waxay sheegeen in dib-u-hawlgelinta tareenka ay si weyn u fududayn doonto gaadiidka, isla markaana hoos u dhigi doonto kharashaadka.
Wasiirka Maaliyadda Itoobiya, Axmed Shide, ayaa sheegay in xaqiijinta badbaadada gaadiidka shidaalka iyo kordhinta awoodda gaarsiinta ay lama huraan u yihiin daboolidda baahida sii kordheysa ee suuqa Itoobiya.
