Dijitaleynta Nidaamka Cadaaladda Soomaaliya Saldhigyada Booliska ilaa Maxkamadaha iyo Xabsiyada.

Soomaaliya 10 October 2025 (Dawan) – Soomaaliya ayaa tallaabo muhiim ah u qaaday casriyeynta adeegyada cadaaladda iyo hufnaantooda iyadoo la hirgelinayo nidaam dijital ah oo isku xiraya saldhigyada booliska, xafiiska xeer ilaaliyaha, maxkamadaha, iyo xabsiyada.

Nidaamkan isku dhafan ayaa beddelaya hababka gacanta lagu maamulo oo ay hadda ku shaqeeeyaa hay’adaha garsoorka iyo cadaaladda dalka, kuwaas oo ku saleysnaa warqado la is dhaafsado. Marka la adeegsado nidaamkan dijitalka ah, dhammaan xogta la xiriirta kiisaska – laga bilaabo gudbinta dacwada ilaa maxkamadeynta iyo u wareejinta xabsiyada ayaa si elektaroonik ah loo maamuli doonaa. Taas oo kor u qaadeysa hufnaanta, wada sahqeyn isla xisaabtan ku dhisan, oo dhex marta nidaamyada cadaaladda.

Kulan lagu soo bandhigay Nidaamkan, oo shalay ka dhacay muqdisho ayaa waxaa ka soo qeyb galay mas’uuliyiin ay ka mid yihiin Guddoomiyaha Maxkamadda Sare, Xeer-ilaalaha Guud, Guddoomiyaha Maxkamadda Racfaanka, Agaasimaha Wasaaradda Cadaaladda, Taliyaha ku xigeenka Ciidanka Booliska Soomaaliyeed, iyo Taliyaha Hoggaanka Baarista Dambiyada (CID).

Nidaamkaan oo ay maagalineyso dowladda Mareykanka, Mas’uuliyiinta ka soo qeyb galay waxay isku raaceen, nidaamkan cusub inuu yareyn doono dib u dhacyada dacwadaha, fududeyn doono shaqada hay’adaha amniga iyo garsoorka, isla markaana kor u qaadi doono kormeerka kiisaska socda.

Muxudiin Axmed Cismaan, Taliyaha CID, ayaa nidaamkan ku tilmaamay fursad weyn oo ka caawin doonta in habraacyada shaqada baarista iyo dacwadeynta.

”Nidaamkaan cusub waxa uu naga caawin doonaa baarista dacwadaha isaga oo meesha ka saari doono dhib u dhacyadi ku imaan jiray maxkamadeynta mararka qaarkood” ayuu yiri Taliyaha CID

“Adeegaan waxaa qeyb ka ah in uu yimaado isla xisaabtan shaqada ku saabsan, yaala khalday? Yaa la soo daahay? Haday wax xumaadaan yaa qaadayo mas’uuliyadda shaqada halawday ayaa ka dhalaxeyso nidaamkaa” ayuu yiri xeer-ilaaliya guud ee qaranka.

Guddoomiyaha Maxkamadda Sare, Baashe Yuusuf, ayaa adkeeyay in nidaamkan marka si buuxda loo hirgeliyo uu sare u qaadi doono adeegga cadaaladda, korna u qaadi doono isla xisaabtanka, isla markaana ka caawin doono shacabka Soomaaliyeed helitaanka cadaaladd sax ah.

“waa shaqa wayn oo waxtar u yeelan doonta adeegyada cadaaladeed ee ay hay’adaha garsoorka iyo cadaaladda ay umadda u hayaan, waxaana iska leh dadka iyo dowladda Soomaaliyeed aan ku dadaalno sidi aan u dhameystiri lahayn” ayuu yiri Baashe Yuusuf.

Nimaadkaan cusub ayaa calaamad u ah horumarka dib-u-habaynta garsoorka Soomaaliya, isagoo adeegsanaya tiknoolajiyadda si loo kordhiyo, hufnaanta, iyo wada shaqeynta hay’adaha cadaaladda, isaga oo meesha ka saari doono in qof iskaga jiro xabsi iyada oo hay’adaha kale ee cadaaladda aysan war ka heyn, hadii si sax ah loo adeegsado.