Diyaaradaha Soomaaliyeed oo beeniyay inay qaaraan u aruurinayaan Dowladda

Muqdisho (Dawan) – Guddiga Midowga Shirkadaha Diyaaradaha Soomaaliyeed (AOA) ayaa si cad u beeniyay inay leeyihiin warqad lagu faafiyey baraha bulshada taasoo sheegaysay in shirkadaha diyaaradaha Soomaaliyeed lagu amray inay bixiyaan kharashka safar dowladeed oo ku wajahan Laascaanood.

Warqadda muranka dhalisay, oo lagu suntay "AOA/068/07/2025" lana taariikheeyay 12-ka Luulyo 2025, waxay sheegtay in Xafiiska Ra’iisul Wasaaraha, Wasaaradda Gaadiidka iyo Hay’adda Duulista Rayidka Soomaaliyeed ay si wadajir ah ugu wakiisheen 11 shirkadood — oo ay ka mid yihiin Jubba Airways, Daallo Airlines, iyo Star Sky Aviation — inay mid kasta bixiso $1,091 si loo daboolo $12,000 oo lagu kiraynayay diyaaradda EMB-120 oo qaadeysa wufuud Laascaaood u socotay.

Guddoomiyaha AOA Xasan Xaashi Maxamed, oo si gaar ah ula hadlay Dawan, wuxuu xaqiijiyay in warqaddaasi ay tahay been abuur siyaasadeed. Waxa uu la wadaagay nuqul ka mid ah warqad caddeyn ah oo uu ururku u diray Wasaaradda Gaadiidka iyo Duulista Rayidka 26-ka Luulyo, taasoo si toos ah loogu beeninayo xiriir kasta oo ay AOA la leedahay qoraalka la faafiyay.

“Warqaddan la been abuuray waxaa sameeyay koox siyaasadeed oo doonaysa inay waxyeeleeyaan dowladnimada iyo sumcadda guddigeenna,” ayuu yiri Guddoomiye Xasan Xaashi Maxamed.“Ma jirto wax codsi ah oo ka yimid Xafiiska Ra’iisul Wasaaraha, Wasaaradda, ama Hay’adda Duulista.”

Guddigu wuxuu adkeeyay madaxbannaanidiisa iyo diyaar u ahaanshihiisa iskaashiga hay’adaha xeer-dejinta. Waxa uu ka digay in wararka been-abuurka ah ay khatar ku yihiin sumcadda warshadda duulista hawada Soomaaliya, oo si degdeg ah u kobcaysa.

AOA waxay ugu baaqday Wasaaradda Gaadiidka in ay bilaabaan baaritaan rasmi ah si loo helo cidda ka dambeysay qoraalka la been abuuray oo loo horgeeyo cadaaladda. Waxayna dadweynaha kaga digeen inaysan rumaysan warqadda iyo codsiga maalgelinta ee la sheegay.