$1.5 milyan oo la qorsheeyay in biya la'aanta looga saaro Degmada Doollo-baay ee DDS

Jigjiga 16 December 2025 (Dawan)- Wasiir-ku-xigeenka Xafiiska Biyaha Dawlad-Deegaanka Soomaalida, Cabdi Muxumed Cabdi, ayaa degmada Doollo-baay ee gobolka Afdheer si rasmi ah uga dhagax-dhigay mashruuc biyogelin ah oo laga hirgelinayo tuulada Xiintooy, kaas oo ku kacaya 240 milyan oo birr, una dhiganta ku dhowaad $1.5 milyan.

Xafladda dhagax-dhigga waxaa ka qeyb galay mas’uuliyiin ay ka mid yihiin madax arrimaha xisbiga Barwaaqo ee gobolka Afdheer, Aadan Geedi, iyo Guddoomiyaha Degmada Doollo-baay, Aadan Muxumed.

Mashruuca biyogelin oo ay fulinayso hay’adda UNICEF, iyadoo kaashaneysa Bangiga Horumarinta Dowladda Jarmalka (KfW), ayaa ka kooban dhammaan qaybaha muhiimka ah ee nidaamka biyaha bulshada, waxaana la qorsheeyay in lagu dhameystiro muddada hal sano ah.

Wasiir-ku-xigeenka Xafiiska Biyaha DDS ayaa sheegay in mashruucu uu wax weyn ka tari doono helitaanka biyo nadiif ah, isla markaana uu si toos ah u saameyn doono horumarinta nolol-maalmeedka iyo caafimaadka bulshada ku nool tuulada Xiintooy.

Dhankeeda, UNICEF ayaa xustay in ay ka fuliso magaalada Jigjiga iyo deegaannada ku xeeran mashaariic biyogelin (WASH) ah oo diiradda saaraya biyo nadiif ah, fayadhowr iyo nadaafad, si loo yareeyo saameynta abaaraha soo noqnoqda iyo cudurrada ka dhasha biyo-la’aanta ama isticmaalka biyo wasakhaysan, gaar ahaan kuwa saameeya haweenka iyo carruurta.

Mas’uuliyiinta ayaa mashruucan cusub ku tilmaamay mid xoojinaya adeegyada aasaasiga ah, isla markaana yareynaya biyo-la’aanta ka jirta degmada Doollo-baay ee gobolka Afdheer.