Doorashooyinka Golaha Deegaanka Banaadir oo Markale Dib u dhacay

Soomaaliya, 25 Nofeembar 2025 - Guddiga Madaxa-bannaan ee Doorashooyinka Qaranka iyo Soohdimaha (GMDQS) ayaa kordhiyay muddada loogu talagalay soo gudbinta liisaska murashaxiinta doorashooyinka Golaha Deegaanka ee Gobolka Banaadir ee ururada, taasoo sababtay dib-u-dhac cusub oo ku yimid waqtiga doorashooyinka.

Waqtiga cusub ee loo qabtay ururrada siyaasadda ayaa ka bilaabmaya 26-ka Nofeembar ilaa 10-ka Diseembar 2025.

Go’aankan, oo lagu soo saaray kulan guddigu yeeshay 24-ka Nofeembar, ayaa la sheegay inuu ka dhashay codsi ka yimid qaar ka mid ah ururrada siyaasadda oo dalbaday waqti dheeri ah.

“Guddigu wuxuu dhammaan ururrada siyaasadda ku wargelinayaa in liisaska murashaxiinta kama dambaysta ah lagu soo gudbiyo muddada la kordhiyay,” ayaa lagu yiri bayaanka guddiga.

Horay liisaska murashaxiinta waxaa loogu talagalay in la soo gudbiyo 25-ka Nofeembar.

Tani waxay ka dhigan tahay in doorashooyinkii markii hore loo qorsheeyay 30-ka Nofeembar ay wajahaan dib-u-dhac kale . Guddigu wali ma shaacin taariikh cusub oo doorasho, taasoo ka dhigtay waqtiga doorashada mid aan caddayn.