Soomaaliya, 20 Febraayo 2026 (Dawan)– Barnaamijka Cuntada Adduunka ee Qaramada Midoobay (WFP) ayaa maanta oo Jimco ah ka digay in gargaarka cuntada iyo nafaqada ee badbaadinta nolosha ee Soomaaliya uu joogsankaro toddobaadyo gudahood haddii aan la helin maalgelin degdeg ah oo dhan $95 milyan.
Dhibaatada maalgelinta ayaa ka dhalatay xilli Soomaaliya ay la tacaalayso xaalad abaar qaran ah, ka dib labo xilli roobaad oo xiriir ah oo baaqday. WFP ayaa sheegtay in haddii maalgelin degdeg ah la helin, gargaarka bini’aadantinimo uu dhammaan doono bisha Abriil, taasoo malaayiin qof u horseedi karta halis macluul.
Ross Smith, Agaasimaha WFP ee Diyaar-garowga iyo Ka-jawaabista Xaaladaha Degdegga ah, ayaa sheegay: “Xaaladdu waxay uga sii daraysaa heer laga naxoo. Waxaan joognaa xilli go’aan qaadasho ah; haddii aan tallaabo degdeg ah la qaadin, waxaa laga yaabaa inaan awoodi weyno inaan gaarno dadka ugu nugul waqtiga loogu talagalay.”
Sida laga soo xigtay WFP, qiyaastii 4.4 milyan oo qof—oo u dhiganta rubuc ka mid ah dadka Soomaaliya—ayaa wajahaya heerar dhibaato oo dhanka sugnaanta cuntada ah. Maalgelin la’aanta ayaa ku qasabtay hay’adda in ay si weyn u dhinto howlaheeda; bilowgii 2025, WFP waxay taageertay 2.2 milyan oo qof, laakiin tirada hadda waxay hoos ugu dhacday wax ka badan 600,000.
