Doorashooyinka Muqdisho: Shan xisbi oo ku guuleysatay in ka badan 85% kuraasta golayaasha degmooyinka

Muqdisho (Dawan)– Guddiga Doorashooyinka Qaranka ayaa ku dhawaaqay natiijooyinka doorashooyinka golayaasha degmooyinka Muqdisho, kuwaas oo qabsoomay 25-kii Diseembar 2025, isla markaana noqday doorashadii tooska ahayd ee ugu horreysay ee heer degmo ah muddo ka badan 55 sano.

Doorashooyinkan oo ka dhacay 16-ka degmo ee gobolka Banaadir, ayaa lagu tartamay 390 kursi, iyadoo ay ka qayb galeen 233,314 qof oo codbixiyeyaal ah. Sida ay muujinayaan xogta rasmiga ah, 210,586 cod ayaa si sax ah loo dhiibtay, halka 22,728 cod ay noqdeen kuwo aan ansax ahayn.

Qaybinta Kuraasta waxaa badankooda Uruursaday Shan Xisbi

Natiijooyinka hordhaca ah ayaa muujinaya in kuraasta intooda badan ay ku urureen shan xisbi siyaasadeed oo waaweyn, kuwaas oo wadajir u helay 333 kursi, una dhiganta 85.4% dhammaan kuraasta golayaasha degmooyinka Muqdisho.

Xisbiga Cadaaladda iyo Wadajirka, oo ah xisbiga talada haya, ayaa hoggaamiyay natiijooyinka, kaddib markii uu helay 177 kursi, taas oo u dhiganta 45.4% guud ahaan kuraasta, isaga oo xoojiyay kaalintiisa hoggaamineed ee maamulka degmooyinka caasimadda.

Xisbiga Towfiiq ayaa galay kaalinta labaad, isagoo helay 49 kursi (12.6%), halka Xisbiga Ramaas uu kusoo baxay kaalinta saddexaad, isagoo helay 42 kursi (10.8%). Xisbiga Karaama ayaa galay kaalinta afraad, isagoo ku guuleystay 39 kursi (10%), halka Xisbiga Sincad uu helay 26 kursi (6.7%), kuna dhammaystiray shanta xisbi ee ugu sarreeya.

Falanqeeyayaasha siyaasadda ayaa sheegaya in natiijadani ay muujinayso in codbixiyeyaasha Muqdisho ay doorbideen in codkooda siiyaan xisbiyo tiro kooban oo leh awood abaabul, sumcad siyaasadeed iyo joogitaan muuqda, halka xisbiyada yaryar ay heleen kuraasta ka hartay.

Guddiga Doorashooyinka Qaranka ayaa sheegay in uu qaabilayo cabashooyinka la xiriira natiijooyinka inta lagu jiro muddada uu sharcigu oggol yahay, kaddibna natiijooyinka kama dambaysta ah loo gudbin doono Maxkamadda Sare si loo ansixiyo loona shaaciyo si rasmi ah.

Dowladda Federaalka Soomaaliya ayaa doorashooyinkan ku tilmaantay tallaabo muhiim ah oo loo qaaday xoojinta dowladnimada hoose, ballaarinta matalaadda dadweynaha, iyo horumarinta hannaanka dimuqraadiyadeed ee caasimadda, iyadoo la sugayo sida isbeddelka cusub ee golayaasha degmooyinka uu u saameyn doono maamulka iyo adeegyada bulshada muddada soo socota.

Qaybaha

Qoraallo Cusub

Farriinta Madaxweynaha Jabuuti ee sanadka cusub

Jabuuti oo garab istaag u muujisay midnimada Yemen xilli xiisado kasoo cusboonaadeen gobolka

Doorashooyinka Muqdisho: Shan xisbi oo ku guuleysatay in ka badan 85% kuraasta golayaasha degmooyinka

Doorashooyinka Muqdisho: Shan xisbi oo ku guuleysatay in ka badan 85% kuraasta golayaasha degmooyinka

Farriinta Madaxweynaha Jabuuti ee sanadka cusub

Jabuuti oo garab istaag u muujisay midnimada Yemen xilli xiisado kasoo cusboonaadeen gobolka

Madaxweynaha Soomaaliya: Aqoonsiga Israa’iil ee Somaliland wuxuu furi karaa “Sanduuqa qalalaasaha”

Cimilada Magaalooyinka Soomaalida

Maqaallo La Xidhiidha

M/W Xasan: Israa’iil waxay ku hawlantahay inay si qasab ah Falastiiniyiinta kusoo dejiso Soomaaliya

Itoobiya: Tirada gaadiidka korontada ku shaqeeya oo dhaaftay 115 kun

Madaxweynaha Somaliland oo qorsheynaya inuu booqdo Israa’iil ah bisha January