Jigjiga (Dawan) – Wasiirka Xafiiska Warfaafinta Dowlad Deegaanka Soomaalida, Maxamed Aadan, ayaa si cad u beeniyay warar sheegayay in si gaar ah loo qoondeeyay suuqa Xoolaha ee magaalada Jigjiga, isaga oo ku tilmaamay wararkaasi kuwo been-abuur ah oo lagu marin-habaabiyay bulshada.
Wasiirka, oo ka hadlay xaaladda suuqa xoolaha ee caasimadda, ayaa sheegay in aanay jirin cid gaar ah oo loo siiyay suuqa, isla markaana dowladda ay si hufan u maareyneyso arrinta. Waxa uu xusay in goobta suuqa hore loogu qorsheeyay in laga hirgeliyo suuq khudaar oo casri ah, si loo xoojiyo adeegyada ganacsi ee magaalada loona hagaajiyo bilicda iyo nidaamka suuqyada Jigjiga.
Suuqa ayaa shalay waxaa ka dhacay shaqaaqo dhex martay ciidamada dowladda iyo qaar ka mid ah ganacsatada xoolaha ee magaalada.
Wasiirku wuxuu sheegay in saylada xoolaha loo diyaariyay meel ku habboon ganacsi oo munaasib ah, taas oo lagu xaqiijinayo adeeg suuq oo dhammaystiran, nidaamsan, isla markaana u adeega ganacsatada iyo bulshada si guud.
