Dowladda oo dib ula wareegtay deegaanka Xawaadley

Soomaaliya, 11 Maarso 2026 (Dawan) — Ciidanka dawladda Soomaaliya ayaa Arbacadan maanta ah dib ula wareegay deegaanka Xawaadley ee gobolka Shabeellaha Dhexe, sida ay shaaca ka qaaday Wasaaradda Gaashaandhigga.

Sida ay sheegtay Wasaaradda, howlgalkan milatari ayaa qeyb ka ah weerar ballaaran oo loogu magac daray “Hawlgalka Badar”, kaas oo la bilaabay bisha Ramadaan si kooxda looga saaro deenaada ay ku sugantahay.

Xawaadley ayaa gacanta u gashay kooxda Al-Shabaab tan iyo bishii Juun 2025, kadib markii ciidamada Midowga Afrika iyo kuwa Soomaalida ee xulafada la ah ay ka baxeen deegaanka sababo la xiriira fatahaado xilliyeed oo xooggan.

“Ciidanka Xoogga Dalka Soomaaliyeed (CXDS) ayaa si guul leh u xoreeyay deegaanka Xawaadley, kaas oo horey ugu dhuumaalaysanaayeen maleeshiyaadka Khawaarijta ee Al-Shabaab,” ayaa lagu yiri qoraal ka soo baxay Wasaaradda, iyadoo la xusay in dhowr goobood oo istiraatiijiga ah iyo xarumo sahayda lagu kaydiyo lagu burburiyay intii uu hawlgalku socday.

Xawaadley oo ku taal agagaarka Webiga Shabelle, waxay xiriirisaa magaalooyinka Balcad iyo Jowhar. La wareegiddaan ayaa daba socota guulo xiriir ah oo ay dowladda ka gaartay inta lagu jiray Hawlgalka Badar, oo ay ku jirto la wareegistii dhowaan ee deegaanka Mubaarak ee gobolka Shabeellaha Hoose.

Ciidanka Qaranka ayaa hadda ku howlan hawlgallo “nadiifin ah” oo guri-guri ah si loo xaqiijiyo amniga, waxaana socda hawlo lagu baacsanayo dagaalamayaasha Al-Shabaab, sida ay Wasaaraddu sheegtay.

Wasaaradda Gaashaandhigga ayaa mar kale ku celisay in ay ka go’an tahay xoojinta hawlgallada si loo sugo badbaadada shacabka loona tirtiro goob kasta oo kooxdu u isticmaasho dhuumaalaysiga.