Dowladda oo isbedel ku sameysay hogaanka Booliiska Bay

Muqdisho (Dawan) – Taliska Ciidanka Booliiska Soomaaliyeed ayaa Gaashaanle Dhexe Sadiiq Aadan Cali (Duudishe) u magacaabay Taliyaha Qeybta Booliiska Gobolka Baay ee dowlad goboleedka Koofur-galbeed.

Sidoo kale, degmada Baydhabo, oo hadda ah xarunta ku meelgaarka ah ee dowlad goboleedka Koofur-galbeed, ayaa loo magacaabay Gaashaanle Dhexe Aadan Maxamed Axmed (Moora-gaabeey)

Taliska ayaa sheegay in magacaabistaan ay u adeegayso xoojinta amniga gobolka Baay, oo ay ka jiraan xaalado amni oo adag, iyadoo degmooyin ka mid ah ay joogaan ciidamo kala taabacsan dowlad goboleedka iyo dowladda federaalka.

Sida ay sharcigu dhigayo, taliyayaasha la magacaabay iyo kuwa la bedelayba waxay si toos ah u hoos imaan doonaan Taliska Guud ee Booliiska Soomaaliyeed, sida uu Talisku u sheegay Dawan Media.

Ciidamada ka howl gala dowlad goboleedyada dalka ayaa iskugu jira kuwa si toos ah u hoos yimaada dowladda federaalka iyo kuwa gaar u ah dowlad goboleedyada, waxaana magacaabistaan cusub ay ku soo beegmeysaa xilli magaalada Baydhabo ay ka taagan tahay xiisad u dhaxaysa maamulka Koofur-galbeed iyo ciidamo kale oo taabacsan dowladda dhexe.

Maamulka Baydhabo ayaa dhawaan ku dhawaaqay in ay hakiyey xiriirka uu la lahaa dowladda federaalka, taasoo ka sii dartay xiisadda siyaasadeed ee gobolka.