Muqdisho (Dawan) – Dowladda Federaalka Soomaaliya ayaa sheegtay inay weli diyaar u tahay sii wadidda wada-hadallada ay la leedahay hoggaamiyeyaasha mucaaradka ee Madasha Mustaqbalka, iyadoo ku celisay in wada-hadallada iyo iyo is-afgaradka siyaasadeed ay yihiin waddada kaliya ee lagu gaari karo xasillooni siyaasadeed iyo mustaqbal loo dhan yahay.
Ra’iisul Wasaare Ku-xigeenka Xukuumadda Federaalka, Saalax Axmed Jaamac, ayaa hadalkan sheegay xilli uu ka hadlayay afur wadareed ay soo qabanqaabisay Safaaradda Midowga Yurub ee Muqdisho. Wuxuu xusay in dowladdu dhowrkii maalmood ee la soo dhaafay wadahadallo la yeelatay xubno ka tirsan mucaaradka, isla markaana ay rajaynayso in wadahadalladu ay sii socdaan oo lagu gaaro is-afgarad ku saleysan danta qaranka.
“Anigoo matalaya Dowladda Federaalka Soomaaliya, waxaan caddeynayaa in dowladdu ay si buuxda u taagan tahay dhinaca wada-hadalka, dhinaca tashiga, iyo dhinaca midnimada,” ayuu yiri Saalax Axmed Jaamac.
