Gaarisa (Dawan)- Booliiska ismaamulka Gaarisa ayaa gacanta kusoo dhigay shalay laba eedeysane oo lala xiriirinayo falal isugu jira dhac rabshado wata iyo toogasho ka dhacday waddada u dhexeysa deegaannada Calikune iyo Dagaxaley, sida ay sheegeen saraakiisha ammaanka.
Xarigga eedeysanayaasha ayaa ka dambeeyay howlgal wadajir ah oo ay fuliyeen booliiska saldhigga Dagaxaley iyo saraakiil ka tirsan Waaxda Dambibaarista Dambiyada (DCI) ee fadhigoodu yahay Dhadhaab, kaddib markii ay heleen digniino ay bixiyeen dadka deegaanka oo ka cabanayay weerarro isdaba joog ah oo ka dhacayay waddadaas.
Booliiska ayaa sheegay in howlgalka lagu qabtay eedeysane 26 jir ah oo laga soo qabtay Suuqa Dagaxaley, kaddib markii la helay xog sirdoon oo la xiriirta baaritaanno horay u socday. Sida ay saraakiishu sheegeen, eedeysanaha ayaa qirtay ku lug lahaanshihiisa falalka rabshadaha ah, isaga oo ciidanka ammaanka geeyay goob lagu qariyay hubkii loo adeegsaday weerarrada.
