Ankara (Dawan)- Madaxweynaha Turkiga Recep Tayyip Erdogan iyo dhiggiisa Soomaaliya Xasan Sheekh Maxamuud ayaa kawada hadlay khilaafka dhanka badda ee u dhexeeya Soomaaliya iyo Itoobiya iyo sidii xal looga gaari lahaa, Sida lagu sheegay war-saxaafadeed kasoo baxay madaxtooyada Turkiga.
Labada madaxweyne oo kuwada hadlay khadka telefoonka ayaa sidoo kale isla soo qaaday sidii loosii xoojin laha dhinacyada iskaashiga, waana markii labaad ee labada madaxweyne wadahadlaan muddo ka yar 20 maalin.
Erdogan ayaa tilmaamay in Turkiga uu sii wadi doono dadaalada uu ku doonayo in lagu xaliyo xiisada u dhaxeysa Soomaaliya iyo Itoobiya, islamarkaana la filayo in natiijo wax ku ool ah laga gaaro wada xaajoodka wareegga labaad ee ka dhici doona maalina berri ah magaalada Ankara.
Madaxtooyada Soomaaliya wax war ah kama soo saarin wadahadalka Xasan Sheekh iyo Erdogan ilaa iyo hadda (21:40) Waqtiga Geeska Afrika .
Wadahadalka labada Madaxweyne ayaa imaanaya maalin kadib markii Erdogan iyo Ra’iisul Wasaaraha Itoobiya Abiy Axmed ay kawada hadleen isla xiisaddan iyo dadaallada uu Turkigu ku bixinayo sidii loo gaari lahaa xal degdeg ah.
