USA, 28, September 2025 – Wasaaradda Warfaafinta ee Eritrea ayaa soo saartay hadal uu jeediyay Wasiirka Arrimaha Dibadda, Cusmaan Saalax, kaas oo mar kale ku celiyay in dalkaasi leeyahay madax-bannaani buuxda oo ku saabsan dekedihiisa, isla markaana heshiis kasta oo ku saabsan isticmaalka dekedaha lagu go’aaminayo si laba geesood ah oo kaliya ujeedo ganacsi awgeed. Hadalkan ayaa lagu sheegay shirkii 24-aad ee Wasiirrada Arrimaha Dibadda ee waddamada aan bad lahayn (LLDCs) oo lagu qabtay 26-kii Sebteembar magaalada New York.
Eritrea waa dal xeeb leh oo ku yaalla Badda Cas, waxa ayna daris la tahay Itoobiya oo ka mid ah dalalka ugu waaweyn ee Afrika balse aan lahayn marin badeed. Arrinta ku saabsan helitaanka dekedaha ayaa muddo dheer ahayd mid xasaasi ah, maadaama Itoobiya ku tiirsan tahay dekedaha dalalka dariska ah si ay ula xiriirto ganacsiga caalamiga ah.
Osman Saleh ayaa khudbaddiisa ku soo dhaweeyay Barnaamijka Awaza ee LLDCs oo lagu ansixiyay shirkii Turkmenistan, isagoo ku tilmaamay hannaan muhiim u ah xallinta caqabadaha dalalka aan badka lahayn. Waxa uu carrabka ku adkeeyay in “iskaashi dowladeed uu yahay lagama maarmaan, ma ahan doorasho,” isla markaana uu ku salaysnaado mabaadi’da sinnaanta qarannimada, ixtiraamka wadajirka iyo faragelin la’aanta.
Hadalka ayaa ku adkeystay in dekedaha Eritrea ay yihiin hanti qaran oo aan loo adeegsan doonin arrimo ciidan ama marin ciidan shisheeye. Saleh ayaa yiri: “Heshiis kasta oo la xiriira isticmaalka dekedaha waa in lagu go’aamiyaa wadahadal toos ah oo laba geesood ah.” Waxa uu intaas ku daray in sharciga caalamiga ah, oo ay ku jirto Heshiiska Qaramada Midoobay ee Sharciga Badda, uu aqoonsan yahay madax-bannaanida qaranka ee dekedaha.
Wasaaradda Warfaafinta ayaa sidoo kale soo gudbisay baaq uu Wasiirku ku dalbanayay in laga gudbo heshiisyada goos-gooska ah loona gudbo iskaashi istiraatiiji ah, iyadoo diiradda la saarayo iskaashi gobolka ah oo yareeya kharashaadka ganacsiga, kordhiya fursadaha suuqa, isla markaana xoojiya xasilloonida. Saalax ayaa ku tilmaamay arrintan in aysan ahayn oo keliya mid dhaqaale balse ay tahay dariiq lagu furo awoodda aadanaha iyo horumar waara.
Ugu dambeyntii, Wasaaradda Warfaafinta ee Eritrea ayaa sheegtay in wasiirka dalkaasi gabi ahaanba diidayo faragelin dibadeed, iyadoo mar kale caddeysay in dekedaha dalku furnaan doonaan oo keliya ganacsi sharci ah iyo heshiisyo cadaalad ku dhisan.